Senin, 18 Oktober 2010

SAY'IR DIES UNSYIAH KE 49.(21- 9-2010. Sya'ir :Medya hus/T A Sakti.

Assalamu'alaikum kawôm meutuah.
Ny'ang katrôh langkah nibak acara.
Dies peuet plôh sikureueng udép Unsyiah.
Neubi lé Allah dalam sejahtra.

Keu Bapak Darni Rektor Unsyiah.
Hormat meulimpah lôn peumulia.
Sehat anggota neubi lé Allah.
Geu pimpin Unsyiah dua priode ka.

Para undangan pejabat daerah.
Ny'ang that meutuah pemimpin Bangsa.
Undangan laén ny'ang katrôh langkah.
Hormat meuleupah tuha ngön Muda.

Ny'ang katrôh teuka mulia leupah.
Turôt meuriyah dukông acara.
Malam Kesenian Dies Unsyiah.
Semoga sukses bèk sapeue mara.

Dèk Mahasiswa mulia leupah.
Gata meutuah harapan Bangsa.
Ilmèe tamita beu ridha Allah.
Bak Unipersitas Syiah kuala.

Ulôn horeumat ngön haté ikhlas.
Adoe ny'ang cerdah Muda ngön Dara.
Lheueh nyan horeumat ny'ang that meutuah.
Pimpinan Fakultas ngön Dosen dumna.

Pengabdian mulia fahla meulimpah.
Lam jeuet-jeuet sa'ah peurunoe Bangsa.
Sihat anggota neubi lé Allah.
Rahmat meutamah meulipat

Kruseumangat rahmat bak Allah.
Dies Unsyiah jinoe trôh teuka.
Ka peuet plôh sikureueng useueng sileupah.
Kampus berkiprah di Acèh Raya.

Sinoe dum lahé dari Unsyiah.
Pemimpin cerdah ngön bijak sana.
Inöng ngöAgam ramè meuleupah.
Dari Unsyiah lahé Sarjana.

Jantông haté rakyat Acèh leubèh meutuah.
Tajaga marwah lé tanyoe dumna.
Teumpat meununtut patôt tapapah.
Bèk tapeucaprah teumpat mulia.

Peu èk seumangat Kampus Unsyiah.
Jaga kualitas bersama sama.
Adèk Mahasiswa Mahasiswi ceudah.
Gata meutuah harapan Bangsa.

Bèk beu-o beu-o tajak kuliah.
Ingat keu Ayah seureuta Poma.
Beu sopan santôn Akhlaqul karimah.
Beu takzém leupah keu Dosen gata.

Bukon lé sayang cot tanjông bungöng.
Got that meuganöng jan malam jula.
Adèk Mahasiswa agam ngön Inöng
Beukayém tamöng kuliyah gata.

Bak jeuem pertama poh lapan tamöng.
Di adè kmantong tengeut lam tika.
Kon salah Dosen gata, tan carong.
Gata lam èng-ong belajar h'ana.

Harapan Ayah sabé geudorong .
Gata beucarong capai sarjana.
Bèk abéh watèe, akhé thôn kosong.
Ulèe teuh bingöng 'oh D O teuka.

Meuheut ureueng syik geuniet that keunöng.
Aneuk bèk bingöng lagèe droe ny'ang ka.
H'ana saho rôh h'ana soe tanyöng.
Udép ban langöng sabé gop peukra.

Aneuk bohaté bèk lé lam bingöng.
Geu harap carong 'oh Mahsiswa.
Habéh ngön lampôh trôh leumo inöng.
Meung hansép umöng droe geupeugala.


'Oh lheuh puasa teuka lebaran.
Jak saweue rakan meuriti-riti.
Keu bapak dosen hormat lôn tuan .
Seureuta dekan mandum fakulty.

Neujaga Unsyiah papah pelajaran.
Mutu pendidikan tanyoe peutingi.
Dak lulus Mahasiswa seugala jurusan.
'Oh ditiek lamaran rijang di asi.

Mangat Unsyiah meugah hana ban.
Kon lé khayalan le that bukuti.
Dengön UGM beu ék sayéngan.
Meunan harapan rakyat Serambi.

Cuma mandum nyoe bak dron harapan.
Dosen ngon dekan ny'ang mat kemudi.
Lulusan Unsyiah beujeut teuladan.
'Oh na jabatan bèk tukang korups.

Beu bijak ngön adé saré beujalan.
Lagèe aturan bèkna meu ungki.
Ikhlas tapubuet jeut keu 'Amalan.
Ridha bak Tuhan tanyoe meungapdi.

Di ulèe karéng palémng that maju.
Kupi meuceuhu ramè ny'ang suka.
Haba bacut teuk bèk karu-karu.
Lôn deungö isu na gop peu haba.

Di Bapak Darni meuh'eut neuk maju.
Nibak pemilu dalam pilkada.
Meunyö bit beutoi patôt tabantu.
Geutanyoe brisu trôk bak uroe ha.

Astafirullah kasalah lagu.
Karôh lôn meusu di lua tèma.
Meunyö na salah meu'ah e-teungku.
Lôn bèk neu balu bak hukôm neuba.

Teurimöng gaséh meucéh lôn tuju.
Keu P R satu ketua panitia.
Keu bapak Yusri bak lôn geubi su.
Yue karang lagu ca-é yue baca.


Pak Abdullah Ali Kepala B A U.
Meurumpok laju geu peugah tèma.
Di lôn tan bantah bagah setuju.
Demi ngat maju Beni Budaya.

Etnoe kahasé ca-é lôn lagu.
Meu'ah e teungku pat-pat na cupa.
Seumah ngön pujoe sidroe Tuhan ku.
Unsyiah beu maju tanyoe meudô'a.


Medya Hus/TA Sakti.
Balè Tambéh 18-9-2010.

Daftar Hasil Karya Dalam Seni Budaya Sastra

No Judul Tahun Penerbit Keterangan

1 Suloh Masyarakat ( Jilid 1 - 6 ) 1983 Radar Bireuen Buku
2 Aneuk Gle 1983 KUD Rahmad Banda Aceh Buku
3 Teuku Umar 1983 KUD Rahmad Banda Aceh Buku
4 Dosa di Ateuh Dosa 1983 KUD Rahmad Banda Aceh Buku
5 Hasan Husen (Jilid 1 - 6) 1983 KUD Rahmad Banda Aceh Buku
6 Aneuk Glueh 1985 Radar Bireuen Buku
7 Sastra Mutiara Aceh (Jilid 1-2) 1986 KUD Rahmad Banda Aceh Buku
8 Hijrah Nabi (Jilid 1-2) 1986 KUD Rahmad Banda Aceh Buku
9 Raja Angkasah 1986 KUD Rahmad Banda Aceh Buku
10 Qasidah Aceh 1986 Radar Bireuen Buku
11 Jen-jen Bi/Hom Hai 1987 Radar Bireuen Buku + Kaset
12 Keunong Peunget 1989 KUD Rahmad Banda Aceh Buku + Kaset
13 Ka Lale 1992 Rata Banda Aceh Buku
14 Keunong Daya Jen 1993 MD. Usaha Buku
15 Aneuk Jampok 1994 Radar Bireuen Buku + Kaset
16 Jak Meudike 2001 Alhijrah Buku
17 Bungong Syuruga 2001 MD. Usaha Buku
18 Pakek Keureudong 2003 Rata Banda Aceh Buku
19 Kumpulan Qasidah Aceh 2003 MD. Usaha Buku + Kaset
20 Aneuk Gunci Suruga 2003 Rata Banda Aceh Buku + VCD
21 Hikayat Tsunami 2005 Rata Banda Aceh Buku + Kaset/VCD
22 Hikayat Bungong Jaroe 2005 MD. Usaha Buku
23 Musibah Aceh 2005 MD. Usaha Buku
24 Poh Cakra/Panton Seumapa 2005 Radio Inter News Siaran Langsung
25 Hikayat Pilkada (10 Efisode) 2006 RRI BNA/Jica Jepang Siaran Langsung
26 Nazam Peunawa Hate 2006 MD. Usaha Buku
27 Hikayat Pajoh Sie Lam Lumpoe 2006 MD. Usaha Buku
28 Hikayat Aceh Masa Nyoe 2007 DKAB Buku
29 Hikayat Ulang Tahun Kota Jantho Ke 24 2008 DKAB / Disbudpar Video CD
30 Hikayat Ulang Tahun Kota B. Aceh Ke 803 2008 Aceh TV Siaran Langsung
31 Syair Jaga Uteun 2008 Aceh TV Iklan Layanan
32 Syair Narkoba 2009 Aceh TV Siaran Langsung
33 Syair Peukong Adat 2009 Aceh TV Siaran Langsung
34 Kumpulan Syair Bak Jambo 2009 T.B Rata Buku
35 Syair Pariwisata Kota B. Aceh 2009 Aceh TV / Pariwisata Kota Siaran Langsung
36 Syair Pajak 2009 Aceh TV / Direktorat Pajak Siaran Langsung
37 Nazam PLN 2009 Aceh TV / PLN Persero Iklan Layanan
38 Syair KB (6 efisode) 2009 Aceh TV / BKKBN Aceh Siaran Langsung
39 Syair Qasidah 2009 T.B Rata Buku

Hasil karya keuneubah Ulama yang dihimpun kembali dan alih aksara seperti :
1 Sifeut Dua Ploh
2 Nazam Lam Yah Talim
3 Hikayat Wafeut Nabi
4 Hikayat Bahaya Siribee
5 Nabiyullah Noh As TERTANDA
6 Nabi Dua Ploh Limong
7 Nazam Syarat dan Rukon Islam
8 Syair Tanda Kiamat MEDYA HUSEN
9 Nazam Malaikat Siploh
10 Nazam Isyarah Huruf Hujaiyah Alif Ba

MUQADDIMAH

Alhamdulillah.
Pujoe ngön Syukur keupada Allah Ta'ala ny'ang ka geubi Rahmat, sihat pikéra ngön sihat badan geutanyoe mandum, sabé lam mubahgia hudép ngön Rahmat Po Tallah dan tanyoe tameulakèe kong Iman di Dônya ngön di Akhérat. Seulaweuet saleuem kepada Nabi ny'ang rayek Muhammad SAW, ny'ang ka geuba umat nyoe u 'Alam ny'ang peunöh 'Ileumèe pengetahuan. H'ana tuwo cit keu Sahabat dan keluarga Rasulullah seureuta para 'Ulama ny'ang ka geuwoe bak Allah, dan ny'ang mantong na ateueh rueng Dônya. Ngön rahmat Allah,ka lôn peuteubiet lom Sya'ir Acèh,SULÔH MASYARAKAT.ny'ang ka lheueh geupeuteubiet dilèe lé percetakan RADAR Bireuen. bak thôn 1983. Perlèe lôn brithèe cetakan awai le salah Pakhôk,Canèk ngön Buhu,dalam cetak barô Nyoe ka lôn peusamporna bacut sapat, bah pih meunan thèma teutap lagèe yôh awai. Beuthat ka tapeu bèrèh mungkén na cit kureung h'ana sesuai lagèe Syédara meuh'eut. Akhé haba Ny'ang gèt-gèt neucok, ny'ang
brôk neuboh bèk gadoh kiramira. ny'ang peunténg Seni Budaya Acèh beu
tapeulara…Amin.




B.Acèh. 3-3-2009.

Pengarang.

Medya hus.

BUKA HABA PHÔN

Deungön Bismillah kisah mulaan.
Pujoe keu Tuhan ny'ang Mah'a Agông.
Seulaweuet saleuem keu Muhammadan
Rasul piléhan ny'ang that ta sanjông.

Kepada Sahbat meuhat 'oh lheueh nyan.
Keluarga sajan beu tapeulamông.
Para 'Ulama Auliya Tuhan.
Bèk tuwo rakan kuta ngön gampông.

Lheueh nyan keu Gurèe teuntèe tuwo tan.
Hormat lôn tuan ny'ang cukôp lamông.
Gurèe pengarang Abang lôn tuan.
Bak pembukaan horeumat sanjông.

Saleuem dua krak nibak karangan.
Dari lôn tuan Aneuk di gampông.
Pengarang Muda h'ana jabatan.
Meucarong pih tan nan pih tan agông.

Izin meulakèe gurèe lôn tuan.
Neuk peugot Taman rumöh ngön anjông.
Lôn peugot lampôh Gurèe beh sajan.
Teuma 'oh lheueh nyan pula ngön jagông.

Pula ngön kacang kadang meujan-jan.
Watèe trôh rakan tareubôh langsông.
Lôn pula campli ubi 'oh lheueh nyan.
Macam tanaman trôh bak- bak gadôh

Jampang teuingat meuhat lôn tuan.
Kana tanaman campli ngön jagông.
Napat di Gurèe lakèe bantuan.
Bak ulôn tuan neulakèeulông

Meunan Gurèe beh lôn bôh bandéngan.
Dalam karangan bacut lôn sigông.
Gantoe meusapat berjabat tangan.
Ngön ulôn tuan sang saboh gampông.

Izin beuraya rika karangan.
Cita lôn tuan Aneuk di gampông.
Meuheut ban Gurèe lagèe droe neuh nyan.
Peugot karangan kisah meusambông.

Kon meukeusut lôn susôn karangan.
Peugot tandéngan lagèe di panggông.
Meubèk neu anggap meuhat sayéngan.
Neukira rakan duek saboh payông.

Sya'ir lôn rika haba pedoman.
Seubagoe hiburan Seni tatampông.
Peumaju Budaya ata saboh jan.
Tanyoe seniman beuraya dukông.

Cahya di langèt meublèt-blèt h'an ban.
Bintang lam awan peungeuh peu reulông.
Medya husén peunyalén karangan.
Muda ruppawan Aneuk miet gampông.

Pucôk Kr.Sabé. 2 Mei 1983.
Pengarang Muda. Medya hus.Kr.Sabé
Acèh barat,Daerah Istimewa Acèh.

SALEUEM KEU RAKAN

Alhamdulilah Allah ya Tuhan.
Ny'ang peujeuet 'Alam mandum lat batat.
Allah tapujoe lé tanyoe Insan.
Uroe ngön malam wajéb taingat.


Seulaweuet saleuem akan Janjôngan.
Rasul piléhan Nabi Muhammad.
Serta Sahabat meuhat lom teuman.
Keluarga sajan baca salawat.

Para 'Ulama teuma 'oh lheueh nyan.
Peurunoe Insan jalan ny'ang teupat.
Όh lheueh nyan teuma Saleuem keu Rakan.
Inöng ngön Agam timu ngön barat.

Saleuem seumapa keupada Rakan.
Dari lôn tuan peunoh horeumat.
Seluruh Acèh waréh lôn tuan.
Ny'ang saboh Iman saboh Syari'at.

Diphôn that saleuem lôn kheun keu Rakan.
Syédara lôn tuan di Acèh Barat.
Wali ngön karông gampông ngön peukan.
Waréh ngön Rakan ulôn horeumat.

'Oh lheueh nyan Sahèh Acéh Selatan.
Saleuem lôn tuan keurakan sahbat.
Blang pidie Singké sampé Bakongan.
Trumon Terbangan trôh u Manggamat.

U Acèh rayek lôn peutrôk sajan.
Saleuem keu Rakan deungön horeumat.
Ibu kota Banda teuma 'oh lheueh nyan.
Lèwat karangan Saleuem peu intat.

Teuma u Pidie nyan pih tuwo h'an.
Saleuem lôn tuan kawôm keurabat.
Aduen ngön Adoe tuwo di lôn tan.
Kareuna sinan nanggroe Nèk meuhat.

Acèh Utara teuma 'oh lheueh nyan.
Keu Waréh Taulan Saleuem horeumat.
Kayém ulôn jak bak Percetakan.
Jak jôk karangan Ca é Hikayat.

Lheueh nyan Takengon èk gunöng jalan.
Leupie disinan udara sehat.
Lôn peu ék Saleuem keu bandum Rakan.
Ama Ine, sajan Waréh keurabat.

U Acèh Timu laju lom teuman.
Saleum bak Rakan di Acèh Barat.
Langsa Peureulak na lôn jak keunan.
Ngön Gurèe sajan jak ba Hikayat.

Acèh Tenggara lôn sapa Rakan.
Dalam karangan Saleuem peu intat.
Meuheut lam haté sabé jak keunan.
Eu pemandangan Alam cidah that.

Teuma u Sabang jeumeurang keunan.
Saleuem keu Rakan laju lôn intat.
Keuneukai Ibôh trôh u Balôhan.
Waréh ngön Taulan bandum horeumat.

Seluruh Acèh sahèh e Rakan.
Saleuem kiréman dalam seunurat.
'Antrôh u pulo tuwo di lôn tan.
Seumeulu sajan sabé teuingat.

Beurayek Dô'a Syédara Rakan.
Beutrôh tujuan.lagèe lôn hajat.
Ngön Dô'a Gurèe teuntèe na jalan.
Ngön Dô'a Rakan badan beusihat.

Syukur keu niekmat Rahmat bak Tuhan.
Geutanyoe Insan hudép lam sihat.
Ètnoe meumada haba kiréman.
Dalam karangan Saleuem peu intat.

Meukalôt udeueng lam krueng meukawan.
Meukalôt Peukan le ureueng meukat.
Ulôn peucukôp seutôp khabaran.
Saleuem keu Rakan tapiyôh siat.

Pengarang : Medya hus, Kr.Sabé
Acèh Barat.prov.DISTA.

HABA PEUINGAT Sya'ir:Medya hus.

Ammabakdu laju tatuléh.
Sampoe beu abéh Ca é tasusôn.
Nabacut haba wahé e Waréh.
Dua lhèe baréh karangan bak lôn.

Haba lôn kirém meuchén 'oh habéh.
Deungön até gléh h'ana meurabôn.
Keudum kawôn droe blah noe ngön blah déh.
Sinoe ngön sidéh Banda ngön Dusôn.

Daweuet lôn keubah bak kertah putéh.
Baét ngön baréh meu ék ngön meutrôn.
Haba nasihat meuhat lôn tuléh.
Beujeuet keu Tambéh narit bak ulôn.

Meunurôt Ileumèe ny'ang mèe tapeucéh.
Meunurôt aréh dum nan tapeutrôn.
Rot Seni Sastra haba lôn reuntéh.
Bejeuet peunuléh peunaw'a rihôn.

Seusama Islam saban saban e Waréh.
Taingat beugléh até bèk rabôn.
Salah ngön silap pat na meuguréh.
Ingat beu abéh bèk karan karôn.

Dalam hudép nyoe tanyoe beu aréh.
Bèk sampé meukréh Syèthan peurawôn.
Meunyö kasilap teukap bruek lipéh.
Nasihat Waréh beujeuet keu Duk

Bukon that sayang takalon tapéh.
Gajitôt habéh asap meugulông.
Haba peuingat tasambat tuléh.
Baca beu abéh uram ngön ujông.

Keadaan nanggroe jinoe tareuntéh.
Inoe ngön idéh ka ta eu langsông.
Jameun Modèrèn meurèn-rèn habéh.
Ny'ang Iman lipéh jadèh digulông.

Meumacam bangön takalon meucéh.
Blah noe ngön blah déh kuta ngön gampông.
Le turôt Syèthan rot jalan paléh.
Bak buet ny'ang jayéh ka ramè dukông.

Bak jalan rot wie meuputie keudéh.
Ladôm meupayéh rhôt dalam urông.
Jalan Nuraka hawa 'oh habéh.
Syuruga ny'ang gléh h'ana soe sanjông.

Judi ngön tarôh éh rôh buet paléh.
Jak rabu abéh geu balôt bakông.
Nyöna piasan malam h'ana éh.
Beuceukang beutéh h'ana thèe untông.

Ladôm bloe buntut jeuheut ngön reugéh.
Ny'ang leubèh paléh judi meu sabông.
Nyan buet lam nangroe sinoe ngön sidéh.
H'ana soe langgéh ureueng jak sinthông.

Bak meu èn batèe pih seudèe abéh.
Karu ngön Matéh di Apa Galông.
H'ana geukira hareuta dikréh.
Όh watèe reugéh barô pèh pungông.

Di Aneuk Inöng meukeunöng meucéh.
Pakaiyan gop jéh geupakèk langsông.
Sileuweue pay'ang 'ok reupang di kréh.
Bajèe pih lipéh arat bak kitông.

Ho ny'ang galak droe jak keunoe keudéh.
H'ana lé patéh na sihat Makdông.
Ayah ngön Poma cara ka abéh.
Nyö Aneuk paléh teubiet ie idông.

Kon mantong Dara ka takalon gléh.
Ny'ang Muda paléh pih na di gampông.
Peugot peue galak jak ho teuseuréh.
Ladôm geujéb jéh ie ta eun gulông.

Model di bajèe lagèe that seudéh.
Ijô ngön putéh na itam galông.
Adat Budaya ka h'ana patéh.
Moral kalipéh Iman kasirông.

Jak manoe safa gura 'oh habéh.
Di panté duek éh meusigông-sigông.
Manoe saboh bhan meujan meutindéh.
Ala peurancéh karamè ny'ang rhông.

Pergaulan bebas leupah that paléh.
Akhlaq dikréh remaja gampông.
H'ana ék tatham buet nyan talanggéh.
H'an soe ba puréh ceunuet bak pungông.

Katrôk bak masa Agama reugéh.
Iman le lipéh pikéran sirông.
Siseuen-seuen bacut tirut ban puréh.
Όh akhé habéh nyö tan tadukông.

Nyö bak Meuseujid cit dit trôk waréh.
Nyö bak buet paléh ramè ny'ang arông.
Nyö bak buet désya gembira abéh.
Nyö bak buet ny'ang gléh beu-o geu tampông.

Nyan keuh jeuet bala tarasa peudéh.
Meutindéh-tindéh Allah Geu sinthông.
Kareuna Hamba désya meulapéh.
Seusama waréh meukoh-koh reubông.

Paké ngön meupoh h'an gadoh beugléh.
Sinoe ngön sidéh di kuta gampông.
Allah h'an riza désya ta tindéh.
Bah sidroe paléh teutap geusinthông.

Takalon bala teuka meulapéh.
Padé dum putéh rangoe ôn tutông.
Kareuna Hamba di puga paléh.
Bak buet ny'ang jayéh teulangsông.

Kon keuh salah gop meuleuhop beutéh.
Kon salah puréh ruhung keutupông.
Salah geutanyoe sinoe e-waréh.
H'ana tapatéh printah Ny'ang Agông.

Kon salah ubông anjông katiréh.
Kon salah baréh tulésan sirông.
Kon salah rangkang ka irang bintéh.
Kon salah payéh habéh ôn tutông.

Kon salah jalô tajô lam paréh.
Kon salah uréh bui pajôh jagông.
Kon salah teubèe peureudèe tangleh.
Kon salah Naléh h'ana asoe krông.

Kon salah itam meuligan putéh.
Kon salah tapéh bak-u, layèe ôn.
Kon salah Musang pisang dum habéh.
Kon salah tuléh h'ana gèt pantôn.

Kon salah Nanggroe jeut sagoe peudéh.
Deungön haté gléh piké rakan lôn.
Ulah Manusia Angkara paléh.
Sinoe ngön sidéh bala neu peutrôn.

Bukon that sayang bintang peureuséh.
Syahya h'anlé gléh leumah udusôn.
Kale that Hamba lam dônya tan gléh.
Haté meuguréh mata ka rabôn.

Moral kakeusieb kadit that ny'ang gléh.
Iman kalipéh sosial di trôn.
Meuyö Akhérat ingat kalipéh.
Ny'ang bagah patéh dôya peu ayôn.

Meunan ibarat lôn surat Tambéh.
Cipiké beugléh e-syédara lôn.
Hukôm tan teupat rakyat le meukréh.
Leka meulanggéh printah Ilahôn.

Beureukat tanlé haté meuguréh.
Seusama waréh le ka meukôn-kôn.
Tanaman Nanggroe sinoe ngön sidéh.
Hama meulapéh sabé tiep-tiep thôn.

Kajeuet syédara tarasa peudéh.
Bala meulapéh banda ngön dusôn.
Tabeudoh jinoe woe bak jalan gléh.
Sampôh beu habéh buet-buet ny'ang rabôn.

Peukong Syari'at ngat Nanggroe beurséh.
Bèk lé tacuréh adang bak ubôn.
Peuji-ôh jeuheut pubuet ny'ang gléh-gléh.
Po Nyoe ngön Po Jéh hudép beurukôn.

Pengarang : Medya Hus Kr.Sabé.

TAJAGA ANEUK Sya'ir:Medya hus

Ngön Nama Allah kisah tarika.
Pujoe Yang Kuasa sidroe ny'ang Makbut.
Beu ék seuleusoe lôn rampoe haba.
Beu ék keuh leungka lagèe meukeusut.

Jinoe lom Cut Bang takarang haba.
Seuen-seuen sibanja lôn peutrôn daweuet.
Nyö panyang umu Tuhan Ku peuna.
Cit èk tarika peue-peue ny'ang meuheut.

Beudoh di Geudông langsông u-Cunda.
Όh watèe gisa piyôh di Punteuet.
Meukeusut lôn tuléh Tambéh meuguna.
Teuntang hai jaga Aneuk Miet Cut-Cut.

Aneuk yôh ubit beugot tajaga.
Amanah Esa wajéb ta peubeuet.
Beugot tasatoh beujroh tajaga.
Bèk sampé bahya dudoe lut butut.

Umu tujôh thôn masa phôn mula.
Ilmèe Agama peurunoe beujeuet.
Lheueh nyan ta intat meuhat Sikula.
Ileumèe Dônya beuna meununtut.

Bèk sampé bakhé 'oh akhé masa.
Sayang lagoina rôh dalam jeuheuet.
Geutanyoe Ayah beupah tajaga.
Beugèt tabina yôh masa ubeuet.

Seubab yôh ubit cit that mulia.
Putéh lagoena haté Aneuk miet.
Goh lom meucorèng mèrèng ngön sukla.
Meunyan keuh masa peurunoe beujeuet.

Leubéh-leubéh lom hukôm Agama.
Beuna tabina tajak jôk bak Beuet.
Bèk sampé rugoe dudoe trôh teuka
Aneuk Miet Muda meusapeue h'anjeuet.

Tajaga Sinyak hai Mak bahgia.
Cukôp mulia jaga Aneuk Cut.
Peue lom abéh pèng jalan Agama.
Meuteumèe fahla bak sidroe Makbut.

Aneuk amanah Allah Ta'ala.
Beugot tabina bèk sampé jeuheut.
Nyö jeuheut Aneuk meusireuek lamgla.
Geutanyoe désya h'ana jajôk Beuet.

Peuelom jameun nyoe jeut sagoe kana.
Teumpat Agama ureueng seumeubeut.
H'ana lé payah susah tamita.
Jeuet-jeuet pat kana asai tameuheut.

Barat ngön timu ta-eu dum kana.
Dyah Ulama teungku ny'ang peu Beuet.
Neujak jôk laju umu mantong na.
Yôh na kuasa tayue Meununtut.

Peuturi jalan bidang Agama.
Rot nan Syédara ny'ang h'ana meucuet.
Meunyö rot Dayah leupah mulia.
Akhlaq tabina teuntèe jeuet keubuet.

Όh kalheueh muphôm hukôm ny'ang beuna.
Aneuk nyan hai Ma cit kajeuet keubuet.
Peulom kajeuet di peu Beuet Bangsa.
Cukôp le guna fahla kon bacut.

Meunyö peureulèe Ileumèe Dônya.
Tajôk Sikula beuna hai Yahcut.
Supaya teuntèe Ileumèe dumna.
Akhèrat Dônya h'an lé lutbutut.

Agama umum ban mandum kana.
Hudép lam Dônya cit h'ana teungeut.
Beuna taingat Sahbat Syédara.
Sinyak tajaga beu-ék jeuet keubuet.

Aneuk ny'ang Shaléh leubéh mulia.
Ny'ang tanyoe damba beu-ék jeut keubuet.
Nyö kon yôh jinoe geutanyoe aja.
H'an peue tahawa lagèe meukeusut.

Meuguna lampôh sunggôh tajaga.
Meuguna harta na tabi zakeuet.
Meuguna Aneuk Akhlaq mulia.
Keu Ayah ngön Ma sabé di sujut.

Ureueng Syik Gurèe jeuet watèe sama.
H'ana pré Dô'a lakèe baka Makbut.
Aneuk got Akhlaq Ayah Mak bagga.
Trôh lagèe cita aneuk jeuet keubuet.

Ho-ho ny'ang dijakAkhlaq dijaga.
Santôn mulia ji-ôh ngön jeuheut.
Jeuet keupanutan Rakan Syédara.
Όh di keurija sesuai ngön buet.

Wahé Waréh lôn dusôn ngön kuta.
Bandum Syédara lôn peusan bacut.
Keupada Sinyak Akhlaq tabina.
Peuturi Beuna, peuji-ôh jeuheut.

Meuhasé Ayah leupah mulia.
Seureuta Poma bina Aneuk cut.
Geudidik hasé sampé karaya.
Iman h'an cupa Moral h'an kinyuet.

H'ana geudidik 'ansyik bak Dônya.
Nibak Agama pihna geupeubleut.
Agama tantoe paloe jiteuka.
Όh akhé masa jiteuka jeuheut.

Keupeue na pangkat jeuet pat kuasa.
Akai beulaga gadôh seumeungeut.
Karna tan muphôm hukôm Agama.
Syéthan peudaya tapubuet jeuheut.

Beuthat tan pangkat talhat bak dada.
Hudép sijahtra meunyö na tabeuet.
Beuthat lam miskin gasien ngön papa.
Hudép mulia ji-ôh ngön jeuheuet.

Bukon lé sayang sibintang kala.
Όh malam jila kaseupôt bacut.
Bukon that sayng nyötan Agama.
Sabé lam Désya rôh tanyoe pubuet.

Beuna tapiké wahé Syédara.
Sinyak tajaga bèk peujeuet-peujeuet.
Jaga beubeutoi bah cantoi kerja.
Wajéb tabina nyan kon buet bacut.

Ètnoe keuh dilèe teuntèe Syédara.
Teuntang tajaga Aneuk Miet Cut-Cut.
Keubhah nyöng laén tasalén haba.
Ca é lôn rika baca dang teungeut.

Pengarang : Medya Hus.

SHALAT Sya'ir: Medya hus

Bukon that sayang tapandang padé.
Kahabéh maté bala Allah bri.
Bukon that sayang Cut Bang bohaté.
Όh tanyoe maté kiban keuh bagi.

Ny'ang h'ana Shalat arat 'oh pagé.
Peue lom ny'ang bakhé tan ikôt Nabi.
Teuntèe Nuraka balasan Akhé.
Tubôh teuh ilé tutông h'an sakri.

Suai Sembahyang e-Bang bohaté.
Bacut lôn ca é wahé e Akhi.
Nyan keuh Ibadat wajéb tapiké.
Si uroe bèk pré na limöng kali.

Tiyang Agama beuna tapiké.
Meubèk tapré-pré Ayah dan Ummi.
'Ibadah Shalat le that meuhasé.
Όh uroe Pagé cukôp le arti.

Suebab Sembahyang di Padang Pagé.
Lé Rabbul Qadé nyan phôn geusudi.
Meunyö 'Ibadat Shalat kahasé.
Di Padang Akhé tanyoe h'an lé gli.

Nyan saboh rukôn Islam ny'ang Adé.
Beuna tapiké dum umat Nabi.
Bèk sia-sia beuna tapiké.
Ganjaran geubré 'Azeub Tuhan bri.

Olèh karna nyan rakan bohaté.
Watèe bèk tapré pujoe Rabbi.
Sembahyang limöng peudong beusaré.
Beuna tapiké tanyoe Islami.

Aneuk ny'ang ubit wajéb ajar lé.
Peurunoe bèkpré hukôm peuturi.
Bateue sah Shalat syarat beumeukré.
Awai ngön akhé meupat mulai.

Bak rukôn lhèe blah beupah di tukré.
Fatihah beuhasé,Qauli ngön Fekli.
Bak bhah Sembahyang rijang beuhasé.
Peurunoe saré keu Putra Putri.

Cara Sembahyang Cut Bang bohaté.
Beuna tapiké wajéb peuduli.
Nyö keudroe h'an pah u-Dayah jôk lé.
Bèk sampoe akhé bangai h'an sakri.

Umu tujôh thôn yôh phôn peuturé.
Beuna tapiké surôhan Rabbi.
'Ibadat Shalat peuingat sabé.
Bèk sampé jahé di pubuet keji.

Rumöh na Shalat ingat bohaté.
Tiep uroe sabé rahmat Tuhanbi
Ji-ôh ngön maksiet meunan cit jahé.
Lam teunang sabé mudah raseuki.

Lethat fahala beuna tapiké.
Όh watèe mate mudah Allah bi.
Soe sunggôh Shalat mangat 'oh akhé.
Όh uroe Pagé sajan ngön Nabi.

Ureueng 'Ibadat Shalat h'ana pré.
Όh uroe pagé leupah bak titi.
Leupah bak bahya h'ana ׳azeub lé.
Seunang ׳oh bukon lé kuasa Rabbi.

Mulai lam kubu cahya hu kandé.
Peungeuh meublé-blé seunang h'an sakri.
Nyan keuh balasan Insan jroh pi-é.
Ibadat tan pré pujoe Ilahi.

Sabé tiep sa׳at Shalat h'ana pré.
Ngön ikhlas haté geu pujoe Rabbi.
Pubuet Ibadat teuingat sabé.
Nyan keuh bohaté Islam sejati.

Peue lom ny'ang peudong Jama׳ah sabé.
Rahmat Allah bré h'ana peue sangsi.
Peu ramè teumpat 'Ibadat bèk pré.
Kuta ngön diglé Masjid bèk sunyi.

Hamba kong Iman keu Tuhan piké.
Batén ngön lahé syukur keu Rabbi.
Nyan keuh Manusia bahgia akhé.
Όh uroe pagé senangan geubri.

Beudoh Syédara sigra tapiké.
Sembahyang bèk pré surôh Ilahi.
Tapujoe Allah jama׳ah sabé.
Supaya akhé dalam Jannati.

Aneuk Cémpala subra bukon lé.
Poma kamaté sayang h'an sakri.
Ny'ang tan Sembahyang sayang ׳oh pagé.
Siksa h'ana pré ׳azeueb Tuhan bri.

Ateueh bak sawô na tulô padé.
Riyôh bukon lé sang di meunyanyi.
Keubhah Sembahyang lôn reupang ca-é.
Ètnoe lôn rawé wahé e-Akhi.

Dalam seunurat peuingat lôn bré.
Diphôn bohaté keudroe pribadi.
Lheueh nyan keu kawôm dusôn deungön glé.
Keu ubat haté di dalam Seni.

Pat-pat na salah kisah lôn rawé.
Meu׳ah beuneubré keu lôn ya Akhi.
Bèk jeuet meupaloe di uroe pagé.
Batén ngön lahé meu׳ah beuneubi.

Pengarang : Medya Hus Kr.Sabé.

PANTÔN ACÈH Oleh: Medya Hus

Bungöng jeumpa meugah di Acèh.
Bungöng ny'ang leubèh cidah lagoina.
Beuna taingat e rakyat Acèh.
Bèk tapeukabèh sejarah bangsa.

Di utôh rumöh teungöh seumeupèh.
Ureueng meugalèh mita beulanja.
Ngön na taingat meuhat keu Acèh.
H'an sampé lilèh cinta keu Bangsa.

Sarang burông umpung bak curèh.
Ateueh pupalèh na manok dara.
Bèk gadoh sejarah tapapah Acèh.
Tabuka tarèh taci eu fakta.

Tamita awé aranté lagèh.
Sinyak meutatèh di sampéng Poma.
Nyö bangsa nyang jroh h'an gadöh tarèh.
H'an geupeukabèh sejarah Bangsa.

Aneuk Kuek dong bak umöng meuklèh.
Sayeuep kateupèh keunöng gelawa.
Acèh lhèe sagoe nanggroe ny'ang leubèh.
Budaya sahèh lom meu Agama.

Ateueh bak rambông Tiyông di meusu.
Ateueh bak tampu na Ticém pala.
Acèh yôh awai cit ka phôn maju.
Masa Èndatu dilèe kajaya.

Jak u meulabôh piyôh pajôh bu.
Kuwah kreueng ngön u mangat lagoi na.
Beudoh Syédara Ayah ngön Ibu.
Beutapeumaju Acèh ny'ang kaya.

Cagèe hitam that kajikap bak-u.
Habéh teulheuep mu lurôh boh muda.
Dilôn rot Seni lôn ci peumaju.
Adak h'an laku lôn cuba-cuba.

Ramè takalon di panton labu.
Barat ngön timu ureueng beulanja.
Sulôh Masyarakat seunurat Teungku.
Adak h'an maju teutap lôn rika.

Ateueh bak sawôh riyôh that meusu.
Beurijuek karu ngön ticém Pala.
Ètnoe keuh pantôn ny'ang ulôn ramu.
Salah sigeutu meu׳ah beuraya.

Wassalam : Medya hus,

GASÉH. Sya׳ir: Medya hus

Alhamdulillah leupah that lapang.
Ulôn keumarang sihat anggota.
Teuntang hai Gaséh lôn tuléh rijang.
Neupuphôm cut Bang haba lôn rika.

Gaséh keu Poma bèk na bantahan.
Gaséh keurakan ׳ohlam sengsara.
Gaséh 'Ulama geubina Insan.
Gaséh keu Rakan tameu syédara.

Gaséh Aneuk Miet didik Sembahyang.
Gaséh h'an leukang cit gaséh Poma.
Gaséh keu untông bèk sirông jalan.
Gasèh keu badan tataubat beuna.

Gaséh di Poma keu Aneuk sayang.
Gaséh di Abang teuma keu cinta.
Gaséh keu lampôh tuweueh tiep-tiep jan.
Gaséh keu intan pasoe lam kaca.

Gaséh hareuta syukur keu Tuhan.
Gaséh Janjôngan Seulaweuet beuna.
Gaséh keu Dônya désya takubang.
Gaséh meu irang bak weuek beulanja.

Gaséh keu iték kueh parék kubang.
Gaséh di bubrang na eungkôt paya.
Gaséh keu manok jôk eumpeuen tiep jan.
Gaséh bak Taulan h'an èk bôh harga.

Gaséh di cangguek na abeuek kubang.
Gaséh keu pisang tuweueh dilingka.
Gaséh bak wali meuriti na blang.
Gaséh le leukang kareuna harta.

Gaséh keu Ayah bèk salah jalan.
Gaséh keu gop nyan beu le-le Dô׳a.
Gaséh keu Gurèe teuntèe hai rakan.
Gaséh bak gop nyan na tanda jasa.

Gaséh keu Bangsa beuna kesatuan.
Gaséh pahlawan ta keunang jasa.
Gaséh keu Nanggroe bèk kacoe dalam.
Gaséh keu Islam hukôm tajaga.

Èt noe ka habéh Tambéh lôn tuan.
Meu׳ah e-rakan meunyö na gaa.
Bak watèe laén salén karangan.
Dari lôn tuan Aneuk miet Muda.

Oleh : MEDYA Hus Kr.Sabé.

SULÔH. Sya׳ir: Medya hus

Ngön rahmat Po Sidroe Allah.
Tuléh kisah rap seuleusoe.
Sya׳ir Acéh bèrèh leupah.
Ulôn kisah ban meurunoe.

Na bacut teuk lôn neuk peugah.
Ubak Ayah syédara droe.
Ny'ang lôn karang kadang salah.
Lakèe meu׳ah bak kawôm droe.

Ny'ang lôn surat that ikhlas.
Kon beurakah ulôn rampoe.
Bak neubaca na h'ana pah.
Bèk neu hujah keu ulôn nyoe.

Lôn goh carong mantong mirah.
Karang naskah lam meurunoe.
Ban meu Gurèe teuntèe goh pah.
Cit na salah sidéh sinoe.

Bah pih meunan h'an lôn ubah.
Gurèe peugah turôt buet nyoe.
Lôn ci karang kadang èk pah.
Ulôn papah Budaya nyoe.

Gantoe sulôh lhôh rot luah.
Mangat leumah lam seupôt kloe.
Droe teuh peungeuh gop pih leumah.
Meunan ulah lôn tamsé nyoe.

Ateueh bak u, meusu tiwah.
Công bak panah na beuragoe.
Ulôn harap na paèdah.
Beuna salah puphôm keudroe.

Ubat duka nyö ka susah.
Baca beupah bôh irama.
Dak gop deungö nyö di peugah.
Jeuet keu Dakwah raya guna.

Donya maju karu leupah.
Nyang got meugah Seni gop ba.
Musék lagu su jeuet sa׳ah
Le meuramah ka geu hawa.

Nyö Seni droe tuloe h'anpah.
Kadipeugah h'an gèt gura.
Budaya gop got tapapah.
Ny'ang keu neubah ka tahina.

Lôn ci usaha béna mudah.
Lô ci sangah bésikada.
Rot Sastra lôn ba Dakwah.
Ngat gairah bèk that langka.

Meunyö cocok cok beubagah.
Nyö h'an pah meubèk nehina.
Èt noe cukôp lôn tôp kisah.
Singöh tamah jilid dua.

SEULEUSOE Oleh: Medya Hus

Ngön Rahmat Allah limpah meukuyan.
Seuleusoe karangan jinoe kaleuengka.
Lôn piyôh siat meuhat e-rakan.
Kajula malam teungeuet lagoena.

Sulôh Masyarakat katamat qalam.
Saboh karangan aneuk Miet Muda.
Meunyö na umu neubi lé Tuhan.
Watée laén jan tasambông teuma.

Pat-pat nasalah meu׳ah lôn tuan.
Kadang karangan h'ana got haba.
Barô lôn puphôn susôn karangan.
Tuentèe goh simban lagèe selèra.

Ny'ang got-got neucok ny'ang brôk bèk simpan.
Nyöng jeuet pedoman cok keu peunawa.
Ny'ang lôn meukeusut beujeuet lagèe nyan.
Beuthat hiburan hikmah jih beuna.

Ètnoe ka hasé ca-é karangan.
Uroe ngön malam ulôn meudô'a.
Beusèhat tubôh beurôh bak jalan.
Ny'ang Ridha Tuhan ji-ôh ngön Dèsya.

Béna pembaca Syédara Rakan.
Lindôngan Tuhan Nyang Maha Esa.
Dalam Syari'at Ta'at kong Iman.
Uroe komdian dalam Syuruga.*

Wassalam: Dari Pengarang, Medya hus.
Mon Mata 1983.