Minggu, 09 September 2012

SYAIR ANEUK GUNCI SYURUGA

          ANEUK GUNCI SYURUGA
            Sya'ir: Medya Hus

Ngon rahmat ALLAH limpah keu umat.
Ureung ibadat syuruga geubi.
Syuruga indah meutingkat-tingkat.
Jarak leupah that peungeuh han sakri.

Syurga Firdaus nyang manyang that-that.
Dalam riwayat ban sabda Nabi.
Dalam syurga gampông cidah that.
Rumöh meusapat meuriti-riti.

Meupintô-pintô kunci teu lhat-lhat.
Rumöh meutingkat kuasa Rabbi.
Di aneuk kunci cidah leupah that.
Warna meukilat ban meuh meupudi.

Aneuk kunci syurga kuasa Kudrat.
ALLAH neupeugot dari Meuh murni.
Na dari Perak lagak leupah that.
Na dari Yaqut kuasa Rabbi
.
Ureueng  nyang taqwa teuga 'ibadat.
Sinan keuh teumpat dalam Jannati.
Teubuka kunci nyo ureueng ta'at.
Syuruga teumpat sajan ngon Nabi.

Trôh lam Syuruga teurasa lazat.
Peue nyang tahajat Tuhan ku neubi.
Kasô ngön Sutra ija meulipat.
Ranjang meunyap-nyap ngon permandani.

Dengon bak kayèe lagèe jih le that.
Boh jih pih mangat mamèh han sakri.
Ngon krueng Syuruga rasa ie mangat.
Binèh krueng le that batèe meuriti.


Peue nyang tameuheut jeut tacok leugat.
Ngon bèe pih mangat dan wangi-wangi.
Dalam Istana cahya blèt-blöt that.
Teuduek meusapat Budiadari.

Wahé Syédara hamba nyang ta'at.
Ikôt Syari'at ban Sabda Nabi.
Meunyo peureulèe Syuruga teumpat.
'Amal 'Ibadat ngon buka gunci.

Kunci Syuruga hamba 'ibadat.
Ureueng nyang ta'at  perintah Rabbi.
Ji-ôh ngon maksiet benci buet jahat.
Iman ngon ta'at ji-ôh ngon keji.

          Banda Aceh.22-6-2003.
                     Medya Hus

Selasa, 04 September 2012

Syair Medya Hus Di Berbagai Acara

SYAIR ACÈH DIBACA PADA
ACARA KONGRES BAHASA
   DI ANJÔNG MON MATA
TGL. 6-8- NOVEMBER 2007

Assalmu'alaikôm Saleuem lôn sahèh
Dô'a nyang leubèh wajéb tabaca
Saleuem keupada peserta Kongres
Bacut lôn cukèh lam bideueng Sastra

Ulôn horeumat meuhat nyang sahèh
Gubernur Acèh nyang buka acara
Bapak Irwandi meukri that bèreh
Geubuka kongres tentang bahasa

Para peserta sama lôn cukèh
Saleuem nyang leubèh lôn peumulia
Keupanitia pelaksana Kongres
Horeumat leubeh that istimewa

Acèh lhèe sagoe nanggroe nyang leubèh
Takalon sahèh meu Adat Budaya
Hasé meukatoe sinoe di Acèh
Nyang cukôp bèrèh teuntang bahasa

Dialek bahasa pih gura leubèh
Ureueng di Acèh meubagoe rupa
Na Lhèe blah bahsa nyang na di acèh
Bacut lôn syarèh deungo syèdara

Nyang phôn bahasa umum di Acèh
Hana lé meuklèh bahasa biasa
Bahasa Aneuk Jamèe miseue Limo Balèh
Όh lheueh nyan sahèh Kluet Selatan dan utara

Bahasa Gayo sagoe leupie Èh
Nyan pih that bèrèh oh peugah haba
Bahasa Alas pih leupah bèrèh
Nyo hana pasèh tateue hana

Bahasa Tamiang tangieng meu alèh
Dimarit pasèh sang Malaysia
Bahasa Julô tan le cit meuklèh
Nalom di Acèh bahasa Haloba

Bahasa Pak pak pih lagak bèrèh
Nias nyang meuklèh pihna bahasa
Bahasa Lekon jagon han pasèh
Nyo gohlom bèrèh bèk peugah haba

Bahasa Sigulai lafai meutaèh
Bèrèh han bèrèh ׳oh tameuhaba
Bahasa Devayan nyan pulo meuklèh
Simeulu sahèh di laôt raya

Nyan keuh bahasa nyang na di Acèh
Geupeugot Kongres lestari teuma
Pakiban cara bahasa ka sahèh
Bèk punah lilèh ngon aros masa

Deungon tapeulara bahasa Acèh
Tanyoe han meuklèh rasa saboh Ma
Pakiban cara bèk peuna dalèh
Nyan bahasa Acèh beugot tajaga

Deungon beureuat geupeugot Kongres
Bahasa di Acèh teupeulihara
Hikmah perdamaian persatuan Acèh
Tapupôk bijèh maruwah Bangsa

Bahasa Indatu laju peubèrèh
Tutô beupasèh Dialèk tajaga
Bèk gadoh Indetitas sejarah Acèh
Tabuka tarèh bahasa nyang kana

Krueseumangat Rahmat teuleubèh
Ubumoe Acèh beumakmu jaya
Ètnoe meumada haba lôn syarèh
Lam Caé Acèh Seni Budaya
--------------00---------------

SYAIR DI ACARA RAKERDA
   DKA DI HOTEL REGINA
TGL. -4-6- DESEMBER 2007

Assalamu'alaikum Saleuem ulôn bri
Ulôn hormati para peserta
Nyang katrôh teuka putra dan putri
Keurakan Seni nyang pike abaudaya

Saleuem lôn peu ék tabék hormati
Caé lôn rawi Sastra Budaya
Nibak uroe nyoe geutanyoe mulai
Keukanun Seni tapiké sama

Para peserta nyang katrôh ili
Jak bahas Seni deungon Budaya
Pembahasan draf Qanun ngat na yum Seni
Bèk hana meukri lagèe nyang kaka

Tameuduek pakat rapat beu meukri
Budaya Seni beuta peulara
Beuteudong Qanun bandum beuasi
Ngat teu lestari Budaya Bangsa

Deungon na Qanun,mandum kameri
Hana le basi seni budaya
Kebudayaan,kesenian serambi
Na soe peuli dikungan dana

Aceh lhee sagoe nanggroe meuseni
Masa yoh lawi dilèe ka jaya
Tapi masa nyoe rugoe han sakri
Di bidang Seni that kureung dana

Rame dum ta-eu pelaku Seni
Secara pribadi peuteubit beulanja
Όh talakèe bak gebernur ngon bupati
Adak na geubi meu ala kada

Hana peng kusus di alokasi
Keubidang Seni anggaran hana
Di group ngon Sanggar Hidup dan Mati
Seniman seu-i susah lagoi na

Beuthat pih meunan han meupeubasi
Di kamoe Seni bit rayek saba
Kareuna cinta seureta hobbi
Bah pèng pribadi teutap berkarya

Meukru semangat rahmat Allah bri
Jinoe mulai ta pupok pupok teuma
Lewat draf Qanun keu dewan tabi
Όh geuteuliti beugeusah lanja

Deungon seumangat pujangga lawi
Aceh beu meuri beumaju jaya
Barat ngon timu beumaju Seni
Aceh di turi bansigom dônya

Beudoh erakan pikiran tabi
Tapike jeut si seni budaya
Mangat Acèh nyoe meuwoe kembali
Marwah Seni Budaya Bangsa

Etnoe keuh bacut lon sebut rawi
Meu'ah beu neubi pat-pat nacupa
Selamat sejahtra pekerja Seni
Jinoe mulai musyawarah sigra

-----------—Medya Hus—---------

      SYAIR ACÈH
PEUJI ÔH NARKOBA
     Oleh: Medya Hus.

Lepah that sayang bintang kejora.
Όh malam jula ditôp lé awan.
Leupah that sayang keunöng Narkoba.
Tubôh binasa rusak pikéran.

Bak jameun jinoe jeuet sagoe nyata.
Suai Narkoba le kejadian.
Naladôm maté meugulé pana.
Ladôm sengsara dalam tutôpan.

Wahé adèk lôn dusôn ngon kuta.
Peujiôh sigra bak buet larangan.
Minuman mabôk trôk bak Narkoba.
Seureuta ganja sabu sabu lheueh nyan.

Goh teupeungarôh bèk rôh tacuba.
Beuna waspada yôh goh keunöng nyan.
Beutapeuji ôh yôh goh binasa.
Beuna tajaga dalam lingkungan.

Adak na rakan jipadan gata.
Beujeuet talangga bak buet lagèe nyan.
Beutabi saran buet nyan meudôsa.
Dalam Negara keunöng tutôpan.

Beutatém ajak bak buet nyang beuna.
Beutatém bina peuleumah jalan.
Dua krèk narit cit le that guna.
Meuteumèe fahla kanibak Tuhan.

Meunancit tanyoe nyoe ureueng tuha.
Tentang Narkoba taperhatian.
Peunyakét rakyat rusak that Bangsa.
Tugah bersama geutanyoe Insan.

Pemimpin ngon rakyat aparat Negara.
Tentang Narkoba beuna sejalan.
Timu ngon barat jeut pat tasangga.
Ulama Umara saban dukongan.

Bèk sampé nanggroe paloe bahaya.
Deungon Narkoba le rusak Iman.
Sayang hansakri Generasi Muda.
Moral binasa keunöng serangan.

Beudoh bersatu peumaju Bangsa.
Akhlaq tabina beucarong Insan.
Tunöng ngon barôh peuji ôh ganja.
Serta Narkoba ta anti tiep jan.

Supaya nanggroe paloe bèk lé na.
Tuhan bi bala macam cobaan.
Peuji ôh buet brôk termasôk ganja.
Dan lom Narkoba perusak Iman.

Tabeudoh jinoe lé tanyoe sama.
Kamponye Narkoba sabé hai rakan.
Nanggroe ngat aman ancaman Narkoba.
Tanyoe meudô׳a lakèe bak Tuhan.

     Blang Bintang.25-10-2010.
        Pengarang: Medya Hus.
-----------------00-----------------

       SYA'IR SAMBÔT JAMÈE
DARI MALAYSIA DI M A A 2009
               Oleh:Medya Hus

Kruseumangat Rahmat bak Allah
Jamèe trôh langkah keunoe kateuka
Dari Malaya mulia leupah
Keunoe geusinggah ubak M A A

Mulia waréh haté gléh leupah
Ngon pineueng teuplah lam bate tuha
Seupreuek breueh padé ngon haté Ikhlah
Lakèe bakAllah beukong Syédara

Jamèe nyang katrôh neupiyôh bagah
Seuramoe luwah ameuleueng tika
Ban Adat Acèh prèh Puan Asiah
Seunang sileupah di kamoedumna

Dari Johor Rombongan langkah
Ji-ôh meuleumpah arông samudra
Sambông Syédara ikat Ukhuwah
Kunjungan Muhibbah u-Acèh Raya

Saban ta jaga Adat Maruwah
Peukong Ukhuwah Khasaah Bangsa
Warisan Indatu meulayu megah
Budaya tapapah deungon bahasa

Malaisya Acèh lam tarèh meugah
Serumpun jelah bah laén bahsa
Nibak uroe nyoe meu ulang kisah
Kunjungan Muhibbah ubalè M A A

       Dibaca olèh Medya Hus
---------------00--------------

      SYA'IR PEUSIJUEK
             syair: Inadatu

Kruseumangat Rahmat meu blé.
Sijuek haté leupie asoe.
Mulia Jamèe nyang ka sampé.
Peusijuek lé Adat nanggroe.

Tueng Seumpeuna bak breueh padé.
Kulét sabé lindông asoe.
Beujroh budhoe beugot pi-é.
Bèk meupaké sabé keu droe-droe.

Peureuték ie tueng Seumpeuna.
Seulama-lama beuleupie asoe.
Όh seu-uem até beuleupie utak.
Beurang ho tajak han meupaloe.

Tueng Seumpeuna bak ôn peusijuek.
Pat nyang jih duek hudép keudroe.
Tueng Seumpeuna bak naleueng sambô.
Lam ie lam thô teuduek keudroe.

U ateueh gop han meutajô.
Han teulanjô beurang kaho.
Tueng Seumpeuna bak bungöng mawö.
Bèe that bako malam ngon uroe.

Tueng Seumpeuna bak manyam pineung.
Bèe that harôm syahya seureuloe.
Tueng Seumpeuna bak ôn gaca.
Ubat luka kulét ngon asoe.

Tueng Seumpeuna bak lubue itam.
Ie didalam teutab ie droe.
Reudôk keu tungkat kilat keu suwa.
Bak buet beuna nyang riza Po.

Tueng Seumpeuna tumpoe bulukat.
Gaséh meu ikat sabé keudroe-droe.
Gaseh sayang beumeusapat.
Ingat meuingat ׳oh sidroe saho.

             Drs. Yusri Yusuf, M.pd.
Kepala Sekretariat MAA Provinsi Acéh.
       dibaca oleh Medya Hus-2009
------------------00------------------

Kamis, 12 Juli 2012

SYAIR MEDYA HUS

CAÉ CEK MEDYA HUS
      < PREH JANJI >

Alhamdulillah  Allah tapujoe
Nyang po alam nyoe badum sineuna
Allah husamat meuhat cit sidroe
Iman le tanyoe mandum syedara

Nabi Muhammad meuhat lom dudoe
Malam ngon uroe seulaweuet beuna
Seureuta sahbat ingat hai adoe
Teuma ׳oh dudoe dan keluarga

Para Ulama nyang na di sinoe
Dan nyang ka geuwoe bak Allah Ta׳ala
Seulaweuet ngon do׳a beuna bak tanyoe
Malam ngon uroe lam jeuet kutika

Kruseumangat rahmat meukatoe
Udalam bumoe neubi keu hamba
Pemilu kada nyang ka seuleusoe
Jinoe ai adoe di aceh raya
Pileh gubernur bupati dudoe
Lheueh nyan rakandroe nyan wali kota
Na padum boh daerah hansah hai adoe
Geu ulang dudoe putaran dua

Talakee do׳a bagah seuleusoe
Bek kacoe kacoe wahe syedara
Ubena rakyat meuhat oh jinoe
Rata jeuet sagoe preh janji teuka

Wahee kandudat nyang that meuragoe
Nyang teupileh baroe watee uroe ha
Ngon suara rakyat gata mat uboe
Kamoe di sinoe preh janji gata

Masa kampanye han peue takheun proe
Rata jeuet sagoe jak peugah haba
Visi dan misi peuturi di droe
Bak masa jinoe kamoe preh teuka

Peue neumeujanji masa saboh roe
Beu ek neupakoe ngon bijak sana
Bek lheuh meujanji ungki  ׳oh dudoe
Nyo meunan bagoe gata binasa

Do׳a raya that kanibak kamoe
Malam ngon uroe lam jeuet kutika
Seumoga aceh beubereh jeut syoe
Bek sampe phang phoe rakyat sengsara

Takalon aceh bereh jeut sagoe
Hase meukatoe meumacam rupa
Memang kaya that le that jeut publoe
Dum hase bumoe meuh batu bara

Tapi tadeungo leh nyo lagee nyoe
Mantong rakyat nyoe hudep sengsara
Ladom tadeungo ek leungo asoe
Mantong rakyat moe lam nanggroe kaya

Bak pemimpin baro harapan kamoe
Beu ek aceh nyoe makmu sentosa
Beu ade neuraca kira keu nanggroe
Bek kira keudroe ngon keluarga

Agama beu maju leuhu jeut sagoe
Syari׳at sinoe beuleubeh jaya
Ekonomi rakyat beugot geupakoe
Bek le payah bloe breuh di kamboja

Breueh nanggroe aceh bereh han bagoe
Tapi that kacoe dagang soedaga
Breuh nanggroe aceh me lua nanggroe
Nyang brok keu tanyoe keunoe di jak ba

Lagee breuh raskin tangieng hai adoe
Kreueh lagee bajoe ladom hai apa
Ka ureueng gasien miskin lam sagoe
Pakon keukamoe neupandang hina
Ekonomi aceh peubereh jinoe
Hase aceh nyoe bek toke lua
Lagee hase geutah susah han bagoe
Payah tapubloe  u Sumatra utara

Sawet ngon nilam meunan cit bagoe
Campli lom dudoe ngan palawija
Hana sau tampong di aceh jinoe
Nyan nyang neu pakoe dilee utama

Lheuh nyan pendidikan beujalan adoe
Mangat get budhoe generasi muda
Ngat na  S D M  generasi tanyoe
Bek bangai tuloe han sakon guna

Nyan keuh harapan saran bak kamoe
Rakyat aceh nyoe ureueng biasa
Peuteupat janji bek ungki dudoe
Pike keu nanggroe pike keu angsa.

Dari lon tuan kasep keuh oh noe
Singoh lom adoe tasambong teuma
Meu׳ah keu ulon aduen ngon adoe
Mandum sinaroe ubena pemirsa

                   Wassalam dari Medya Hus
lheueh Pemilukada 2012 Blang Bintang 21-4-2012 M

NAZAM ACEH STOP NARKOBA

                Nazam Aceh  
                   STOP NARKOBA
                Oleh : Cek Medya Hus
 
Wahé  erakan inöng ngon agam tuha ngon muda
Kuta ngon gampông talarang langsông tentang Narkoba
Sayang keu nanggroe le that meupaloe rusak dum bangsa
Beudoh bersatu barat ngon timu ceugah bersama

Nyang meurusak badan hindari rijang wahé syédara
Nyang jeuet keuracôn meubèk rôh tacôm atoe tarasa
Mulai phôn rukok lheueh nyan talawok tabalôt ganja
Όh té kacandu meutamah laju deungon Narkoba

Wahé adoe lôn bungöng si kuntôm geneurasi muda
Agam ngon inöng bèk gata keunöng deungon narkoba
Raih Pretasi akhlaq terpuji troh ban tacita
Peu jioh rijang bak buet teularang meubek tahawa

Gata meutuah utak teuh cerdas yôh masa muda
Nyo keunöng bakông seurangan jantông moral binasa
Tan lé harapan lam pendidikan h'an trôh lé cita
Désya ngon Tuhan dan lôp tutupan karna Narkoba

Wahé cut abang béna peudagang dan peungusaha
Nyo peureulèe suksès bèk sagai teupèh Narkoba
Peureulèe maju peuji-ôh laju bak buet nyang murka
Hana mamfa׳at akhé meularat hudép sengsara

Di jeuet jeuet kantô wahé bapak-e beuna neujaga
Lingkungan Pemerintah beuna taceugah bèk na Narkoba
Bèk sampè rusak reuloh Akhlaq peugawè dumna
Gadoh panutan iman dum karam rusak neugara

Didalam gampông beudoh tadukông talét narkoba
Beuna bersatu ayah dan ibu tuha ngon muda
Na ureueng  tamong beubagah tanyong nyang mencuriga
Beutatem basmi duson ngon pasi stop Narkoba

Beudoh bersatu barat ngon timu keurija sama
Pemerintah ngon rakyat seureuta meuhat Teungku Ulama
Saban tabasmi Polisi TNI taprang Narkoba
Supaya seulamat dônya akhirat generasi muda

Bèk lé lam nanggroe sidéh ngon sinoe dusôn ngon kuta
Sama tapiké sinoe bèk na lé nyang piep Narkoba
Tahukôm beubrat nyang ka keunong drop tamong penjara
Beuthat aparat beuthat peujabat hana jeuet bela

Supaya nanggroe aman jeuet sagoe ta׳at dum bangsa
Karna got akhlaq Iman tan rusak jroh dum etika
Insan gléh utak hoho nyang tajak le sumberdaya
Tan teupeungarôh lingkungan ji-ôh deungon Narkoba

              Iklan layanan Aceh tv (@ 2012BNN prov aceh)
                     Bang Bintang  22-5-2012  Pengarang  Medya Hus

NAZAM ACEH

NAZAM  ACEH CALON TKI
Oleh Medya Hus

Keu calon TKI haba ulon bi deungo beuget that
Jak mita kerja keudeh ulua tuboh beusihat
Fisik ngon mental dan bek bangai ngon gadoh ingat
Ho nyang tujuan bahsa beu muphom waloe hana that

Bek sapeue hanjeut geutanyoe meuheut tajak u arab
Dudoe meubala wab hanjeut bahsa majikan takat
Peue lom carong tan hana wawasan geutanyoe sisat
Kateuntee paloe dicok geutanyoe diyue krimangat

Bek jak elegal oh dudoe jawai kerja tan meupat
Secara resmi calon TKI meuho alamat
yoh goh lom tajak ta asah utak beukreuh seumngat
siap dokumen bek meu-en meu-en dudoe meularat

Bek palsu dokumen stempel ngon teken da sertifikat
Oh na masalah le Pomerintah kahana bak mat
Oh keunong enaya sideh di lua siksa leupah brat
Bak KBRI tanyoe tan resmi nan tan tercatat

Oleh karna nyan ho nyang tujuan yoh goh beurangkat
Seluk beluk nanggroe nyan Budaya  Hukom beu meuphom  adat
Numboi telepon beumuphom teugon kode beumupat
Perwakilan KBRI  atoe  KJRI  beu meupat alamat.

Peue lom nyang inong ulee teuh bingong diyue buet jahat
Meunyo han tatem tanyoe di kuren dipoh jeuet sa׳at
Meunan keuh bagoe karna tanyoe jak hana teupat
Jak lua nanggroe kon peng tapuwoe tapi meularat.

Iklan layanan di Radio & TV
Produser Firsa Agam

Senin, 28 Mei 2012

SYAIR QASIDAH KALALE

KALALÈ  Sya'ir: Medya Hus


      Kalalè hai kalalè
      Ureueng Islam le kalalè
      Bak Agama le kateungeuet
      Rayek ubeut ka meusanè


      Kalalè le kalalè
      Kuta gampông dusôn keudè
      Keudônya le nyang meuheut
      Meunyo jak Beuet cukôp that rè


      Jameun akhé lahé ta-eu
      Barat timu ureueng lalè
      Lagèe kheun Uama dilèe
      Ureueng dungèe akhé ramè


      Jinoe ta-eu ngon mata ulèe
      Karap padèe bola sèntè
      Di prèh-prèh Ulama teungeut
      Nyang ubeut beut laju jichè


      Ayah Poma le ngong teungeut
      Aneuk bak Beuet han geutém mè
      Bak dônya geutém jak intat
      Bak Akhirat ka geupeubrè


                             Meusambông-

PHOTO KENANGAN DI STUDIO ACEH TV ( MEDYA HUS & CEK MAN ) NS

SENI TRADISI PUSAKA INDATU TAMPIL DI PANGKOR MALAYSIA ( Medya Hus Syeh Sofyan Hambali 17&18 Desember 2011


HADIH MAJA ( NARIT MAJA )

HADIH MAJA ( NARIT MAJA )
Buet nyag hana Sempurna
Geubôh miseue bèk lagèe nyoe.


MANOK  HANA  TAJOE
PUTROE  HANA  RAJA.


GASÉNG  HANA  TALOE
MANOE  HANA  TIMA.


JAK  HANA  MEUHO
BAKO  HANA  KEURIJA.


BOH  PIK  HANA  SAGOE
TALOE  HANA  PUNCA.


PEURAHÔ  HANA  PAWANG
PRANG  TAN  PANGLIMA.


PANAH  HANA  BUSU
GEULUNGKU  HANA  MATA


BEUT  HANA  TEUNGKU
HU  HANA  CAHYA.


PEUKAN  HANA  KEUDÈ
GULÈ  HANA  SIRA.


MANOK  HANA  SEURIWEUEN
UREUENG  HANA  PEUTUA.


PEUTOE  HANA  GUNCI
TITI  MEUNUMAT  HANA.


PANYOT  HANA  MEUNYEUK.
ANEUK  HANA  HAJA.


BLANG  HANJEUT  MEUGOE
BEUSOE  HANA  PEUJA.


( Dok.Cek Medya Hus )

Rabu, 23 Mei 2012

SYAIR SYAIR MEDYA HUS

CAÉ CÉK MEDYA HUS
=BULEUEN  NYANG SUCI=

Deungon  Bismillah di babah sabé
Baca hana pré peue takeurija
Beuthat dua krak tasajak Caé
Deungon gléh até ingat Rabbana

Kruseumangat Rahmat meublé-blé
Sijuek lam haté leupie lamdada
Buleuen nyang suci lôn ci neuk rawé
Lôn cuba uké dua lhèe banja

Buleuen Ramadhan Tuhanku neubré
Cukôp le hasé Fahla dan Taqwa
Nibak buleuen nyoe  tanyoe bèk pré-pré
Mita laju lé amai ngon Fahla

Lethat hikeumah Allah dum neubré
Keu Hamba saré sinoe di dônya
Meuganda Fahla cit na lam sabé
Bah ubé padé pubuet nyang beuna

Beuthat ubé ôk meutumpôk hasé
Metuléh sabé peue takeurija
Asai tapubuet  tan jeuheuet piké
Deungon gléh haté surôh Rabbana

Ngon karna Allah Ibadah bèk pré
Peuji-ôh jahé upat ngon ceula
Buet-buet hana got bèk taseutot lé
Beuthat le hasé tamöng beulanja

Gunöng Gurutèe batèe toe jalan
Gura hana ban meususôn banja
Bak sithôn siseuen buleuen kemenangan
Umat meu Iman seunang gembira

Wahé  Syédara  mita  Amalan
Nyang surôh Tuhan tuwo teuh bèk na
Sunat ngon wajéb peusép hai Taulan
Buet kejahatan bèk na bak gata

Tameu seudeuqah meutuah badan
Uroe kemudian leupah bak bahya
Bèk kriet that haté reulé Amalan
Dalam Ramadhan beujroh mulia

Meunrôt mampu ta bantu Insan
Dak ngon pikéran pih raya Fahla
Deungon teunaga Fahla meukuyan
Seusama  Insan  berbagi  rasa

Buleuen suci nyoe tanyoe  e-rakan
Inöng ngon Agam mukmin lam dônya
Yôh mantong teuga na kesempatan
Pubuet Amalan bèk sia-sia

Èt noe keuh Caé hasé karangan
Dari  lôn tuan  sialakada
Meunyo na cocok cok keu peudoman
Meu'ah  e-rakan meunyo na gasa

Blang Bintang -5-Ramadhan -1432 H.
-5-Agustus - 2011 M.
Dari : Cék Medya Hus
...........................................................
CAÉ CEK MEDYA HUS
=SALEUEM  UROE RAYA=

Assalamu׳alaikum kawom meutuah
Saleuem Ukhuwah bak Uroe Raya
Bak Cek Medya haba sipatah
Malam nyoe jeulah bak layeue kaca

Gantoe duek saho meuproe beurakah
Haba tapeugah bak Uroe Rya
Gantoe jeb seutrop nyang cukop mirah
Kuweh Keukarah bak Uroe Raya

Saleum lon peu-ek tabek ngon seumah
Nyang phon meutuah ubena pemirsa
Lheueh nyan pengarang Abang ngon Ayah
Nnyang kayem leumah bak layeue kaca

Keu T.A Sakti  hormati  leupah
Cek Amir meutuah ngon Leube Muda
Cut Ngoh Zulkifli pihna sipatah
Saleuem ukhuwah bakUroe raya

Teungku Samuti rawi got leupah
Saleuem sipatah bak lon nyang hina
Dhia Ubit Daroi leh soe nan jeulah
Saleum sipatah bak uroe raya

Bang Nasir limoe leh ho tan leumah
Katrep meuleupah cae geuh hana
Teuma Tarmizi pih meunan ulah
Saleuem lon seurah ngon lapang dada

Teuma keu Bit Cut bacut lon peugah
Saleuem sipatah nyang that mulia
Keu Keuchik Maimun saleum nyang ceudah
Lheueh nyan meutamah keu Ayah Muda

Keuchik Jailani goh turi jeulah
Rot Caé kisah saleuem lon sapa
Siti Asra dara nyang ceudah
Lheueh nyan meutamah Halodi Haka

Muhammad Ali Lamsim yakin sileupah
Peugot seujarah Cae geurika
Teungku Hatta Aje lon me si ulah
Saleum Muhibbah bak uroe raya
   
Teungku Min geundring ka lon ngieng jeulah
Seumangat leupah beuthat  katuha
Teuma Lem Kari pih cukop gagah
Meujan na kupiah meujan jan hana

Teuma keu Cek Man pih han lon pinah
Saleum sipatah bak lon keu gata
Abi Dawod Samahani meukri that leupah
Lheuh nyan meutamah keu Syeh Min Cakra

Sulaiman Agani lon bi si ulah
Saleuem sipatah bak Uroe Raya
Teuma keu Cut Hab pih gap meuleumpah
Saleuem lon ruwah rot layeue kaca

Abu Sulaiman nyan di Gue Gajah
Saleuem nyang ceudah bak Uroe Mulia
Ter Istimewa keu Amir Hamzah
Saleuem ukhuwah sambat syedara

Laén nibak nyan rakan meutuah
Keu Mak ngon Ayah kawom dilingka
Tuha ngon muda hina ngon meugah
Dum hamba Allah Mukmin lam donya

Sepoh noe dilee teutee lon peugah
Saleuem ukhuwah bak Uroe Raya
Pat na salah lon langsong peu meu׳ah
Beuna ngon salah cut deungon raya

Wassalam dari: Cek Medya Hus
Dimaca di Aceh tv 3-9-2011 M.
.........................................................
 CAÉ MEDYA HUS
     UROE RAYA

Deungon bismillah kisah lon buka
Dua lhee banja haba lon peu-ék
Rot Caé Aceh saheh tarika
Bak layeue kaca meuleumpah asyék

Katroh lom sampoe meu Uroe Raya
Cukop gembira abang ngon adék
Oh lheueh Takeubi hate gembira
Kunjông syedara jeub rumoh geu-ék

Ladom bak qubu laju meudo'a
Qulhu geubaca ulèe meu asék
Jeurat geupeugleh beu abéh rata
Nyang jareueng teuka naleueng payah sék

Ta-eu jeut gampông dusôn ngon kota
Dum Manusia ili ngon mudék
Oh ban meurumpok deungon syedara
Meusaleuem lanja geu beu-ot tabék

Teuma oh lheueh nyan geumeu'ah desya
Ladom meuwawa meutarek tarek
Hate terharu rasa gembira
Bak Uroe Raya meubayék-bayék

Ureueng meu Iman nyang kagléh desya
Bak Uroe Raya syukur keu Khalék
Sibuleuen peunoh ka geupuasa
Uroe mulia gembira asyék

Bukon that sayang bintang kejora
Lam awan miga cahya hana le
Na cit nyang ladom bak Uroe Raya
Meuriya riya senang that hate

Meunyo aneuk Miet cit ka biasa
Tot lilen cina peu meu-en bude
Nyang cukop paloe tanyoe katuha
Oh Uroe Raya jak pubuet jahe

Ladom meu-en on lam bak meureuya
Leuho ngon asa teu ingat tan le
Saboh bagoe teuk aneuk miet muda
Mantong  remaja jak pubuet jahe

Cok aneuk inong rawon ho hawa
Peudieng bak Honda dijak meurabe
Adak na ayah geuteugah hana
Kameunan rupa takalon lahe

Ladom maricon tam tum meutaga
Cukop gembira geutot hana pre
Geupike meunan meuuroe raya
Hana geukira nyan adat kafe

Ayah ngon aneuk ladom rap sama
Meulomba-lomba meupeu-en bude
Suai abeh peng hana geukira
Peunteng gembira kaseunang hate

Wahe kawom lon duson ngon kuta
Oh Uroe Raya beuna neupike
Adat geutanyoe kon meunan rupa
Ingat syedara bek pubuet jahe

Wassalam dari
MEDYA HUSEN
.....................................................
CAÉ MEDYA HUS
PENGEUET  DROE  KEUDROE

Assalamu'alaikôm kawôm Iseulam
Inong ngon Agam béna pemirsa
Sambôt saleuem lôn sion karangan
Dalam hiburan seni budaya

Alhadulillah limpah pujaan
Keu sidroe Tuhan yang Maha Kuasa
Seulaweuet saleuem keu Muhammadan
Pang Ulee Alam Rasul mulia

Ulon meulakee teuntee bak Tuhan
Beusehat badan deungon anggota
Hate lon beugleh berseh pikeran
Tuleh karangan lam Caé haba

Gunong seulawah meugah hanaban
Jinoe hai rakan leupie han lena
Laweut nyoe ta-eu hayeue hai rakan
Meumacam ragam buet Manusia

Nyang saboh bagoe meunoe ban macam
Harap ban tuan peugasien papa
Cok surat gasien teken le yoh nyan
Peugot keterangan bak keuchik desa

Surat kurang mampu laju geureugam
Ho ngon tujuan laju geujak ba
Padahai ta-eu ladom ureueng nyan
Na moto sedan lampoh ngon atra

Hak ureueng asien geucok dig op nyan
Pakon roh meunan buet Manusia
Nyang ureueng gasien hana ban tuan
Nyang hak keu gopnyan kagop po jeumba

Peugeuet droe keudroe tanyoe lagèe nyan
Peungeut ngon Insan ngon Tuhan desya
Nyang kurang mampu wahe erakan
Beuna tatuban wahe syedara

Geuduek jambo brok batok meujan-jan
Aneuk na lapan hareuta hana
Keureuja tiep uroe jeut sagoe gop nyan
Meusep pajoh han lam keluarga

Aneuk sikula kahana jajan
Meunyo pakayan pakek an tuha
Teuekeudi saket ciret oh malam
Meu ubat pih tan meu ngon bloe hana

Geujak ngon gaki meugari pih tan
Meunyo makanan meu ala kana
Nyan moden ureueng tabi ban tuan
Kon ngon na sedan duek rumoh raya

Wahe pemimpin neungieng beuget trang
Beugot neutimang rakyat tajaga
Pemimpim gampong nyang phon hai rakan
Oh na bantuan beugot neukira

Fakir miskin beu neungieng beutrang
Beuget tatimang rakyat lam desa
Bagi beu ade nyo na bantuan
Bek sampe rakan Tuhan lhom bala

Etnoe keuh mantong dari lon tuan
Singoh lom rakan tasambong teuma
Lon lakee meu'ah wahe e-rakan
Haba lon tuan kadang gasa

Wassalam dari Cek Medya Hus
..........................................................
CAÉ CÉK MEDYA HUS
= TASATOH  BUDAYA=

Alhamdulillah Allah taingat
Seulaweuet meuhat teuma keu Nabi
Teuma keluarga seureuta sahbat
Όh lheuh nyan meuhat Ulama lagi

Neubi Ya Allah tubôh beusehat
Lôn neuk riwayat Caé tradisi
Teuntang budaya sigra lôn surat
Jinoe hai sahbat sang-sang kabasi

Acèh nyoe maju masa saboh hat
Eropa barat sampé  u Turki
Na lhèe boh pasai nyang meuhai that that
Di Acèh meuhat yôh masa lawi

Nyang phôn Agama meunggema  that  that
Hukôm Syariat gèt that peuduli
Lheuh nyan pendidikan jalan jeuet  teumpat
Carong  dum  umat  SDM  meukri

Lheueh nyan Budaya sama geuingat
Geu cinta that-that khasanah neugri
Adat Budaya peulara martabat
Meugah leupah that Budaya seni

Nyan lhèe peukara jaya leupah that
Jinoe hai sahbat kureueng lestari
Budaya Nanggroe tapakoe tan brat
Meunan cit meuhat   Agama suci

Oh ta-eu ureueng rap laén Kiblat
Timu ngon barat Iman sang ka lhi
Budaya barô ta atô gèt that
Ata droe meulhat han tapeuduli

Acèh nyang maju Budaya Adat
Jinoe sayang that wahé e-akhi
Lagèe takalon bangon talihat
Budaya Adat seureuta seni

Kakureueng tampil tangieng sahbat
Kabeu-o that that ureueng lestari
Han tatém jaga harga raya that
Han tatém rawat ngon tapromosi

Padahai Acèh bèrèh leupah that
Nyo got tarawat ji tamong gaji
Tamong devisa nyo ta peusihat
Pakon taseungap han tapeuduli

Keupada pemimpin saran lon siat
Serius taingat keuneubah lawi
Beuna anggaran keunan beule that
Gantoe ta angkat maruwah neugri

Sama tapiké saré meupakat
Pemimpin ngon rakyat bèk dawa dawi
Piké keu Nanggroe pakoe beugot that
Peuwoe martabat lagèe yôh lawi

Acèh beumeugah rupiah beudapat
Makmu dum rakyat mudah raseuki
Ngon hasé Nanggroe tapakoe got that
Rata jeut teumpat trôh investasi

Bèk meugah Acèh ngon buet nyang jahat
Kasus pejabat deungon Korupsi
Ngon ladang ganja narkoba maksiat
Malèe leupah that Nanggroe serambi

Nyoe keuh harapan keu rakan meuhat
Terutama  peujabat seureuta waki
Aceh tapeugot  takot  buet jahat
Ubak Hadharat tamohan diri

Ya Allah neubi kamoe beusehat
Pemimpin ngon rakyat beu geulindungi
Ureueng nyang zalém beu geutém taubat
Hukôm Syari'at maju beuneubi

Etnoe keuh Caé rawé lôn surat
Beujeut mamfa'at soetém peuduli
Lôn lakèe meu'ah salah ngon silap
Lôn piyôh siat wahé  e-akhi

               Dari  Medya Medya Hus
Dibaca sabtu malam di Aceh tv tgl. 24-9-2011
                 Acara Cae bak Jambô
...................................................................
CAÉ CÉK MEDYA HUS 
      SAPEUE PAKAT

Kruseumangat rahmat bak Allah
Keunoe meulimpah timu ngon barat
Nabacut haba lon rika kisah
Meunyo na salah meu'ah e-sahbat

Hudep lam donya syedara meutuah
Beukong ukhuwah wareh keurabat
Beusaboh haba peu sapeue peugah
Bèk meuparikah han sabé pakat

Peue lom di Acèh saheh ka leumah
Oh lheueh ro darah kadamè got that
Hanalé karu jampu prang bicah
Kheundak Po Tallah tarasa mangat

Jinoe geutanyoe jeuet sagoe beupah
Seuramoe meukah peulara leugat
Beusapeue pubuet beujeuet paedah
Beusapeue peugah ngon sapeue pakat

Ulama Umara rata daerah
Beusapeue peugah saboh pendapat
Teuma peumimpin beuyakin leupah
Tulus ikheulah keu pimpin rakayat

Beusaboh hate bek cre aqidah
Iseulamiyah jaga beugot that
Nyan phon ta peukong ta peudong beupah
Kasaboh arah kasaboh kiblat

Oh ka se iman Islam kapah
Beusaho langkah tujuan bulat
Beu sapeue pajoh tabloh se arah
Nyan baro jeulah nanggroe meu daulat

Beda pekeran lam musyawarah
Tan masaalah asai beumeupat
Ngon bek tapeudong nyan beuneung basah
Tapeugot hujah beda pendapat

Tamse ek jalo tajo lam sarah
Tan meuho arah meujungkat-jungkat
Ureueng nyang kayoh bek roh amarah
Ueueng nyang galah jalo peuteupat

Teuma ureueng duek bek gabuek leupah
Bek sihet siblah gundah siat-at
Saboh jalo nyan saban seumeugah
Bak bagah leupah bek le meularat

Oh ka sapeue kheun lanteun pih ka glah
Bak bahya leupah tulong Hadharat
Tapi nyo karu tunu amarah
Meugom lam sarah ka habeh hayat

Meunan keuh tamse tapike beupah
Bek sampe salah oh nanggroe tamat
Yoh masa awai sambai bukulah
Oh te kamewah idang bulukat

Oh tamat tumpok ta adok beupah
Seunang ngon susah beu ade that-that
Beusapeue pakhok tarhok dalam klah
Dak na fiteunah han tumboh liwat

Wahe Bangsa lon ampon doli syah
Sukee nyang meugah peunoh martabat
Tapeugot nanggroe peuwoe Maruwah
Beusapeue peugah timu ngon barat

Talakee do'a nibak po Tallah
Aceh nyang meugah meuwoe seumangat
Beu ade makmu meusyeuhu meugah
Lindongan Allah Pemimpin ngon Rakyat

Wahe rakan lon kawom meutuah
Rata daerah timu ngon barat
Beudoh bersatu peumaju daerah
Bak buet nyang salah peubeuna leugat

Bek  le ta imdroe tapakoe bagah
Aceh nyang meugah nyang po cit rakyat
Soe nyang mat tampok tajok amanah
Nyo hana keumah tajok nasihat

Nyo han geupateh kajadeh salah
Tamusyawarah cok jalan teupat
Peue lom di Aceh cit bereh leupah
Ohna masalah na hukom adat

Hana meunantang deungon syari'ah
Beuna ngon salah mandum jih teupat
Meunan nyang mungken beutatem papah
Soe nyang meusalah penjara teumpat

Èt noe keuh Caé ka hasé kisah
Seubagoe amanah bak ulôn rakyat
Haba Èndatu buhu lôn surah
Ngat na gaiarah sastra lôn surat

Dari awai phôn lôn lakèe meu'ah
Bak ujông jeulah pih meunan meuhat
Ètnoe sikada rika lôn peugah
Singoh ta tamah nyo tubôh sihat

Dibaca oleh Cek Medya Hus
Sabtu malam 1-10-2011 di aceh tv
..........................................................

Senin, 21 Mei 2012

JAMBO CAE ACEH TV


CAE BAK JAMBO

SALEUEM  PHÔN 
ACARA  CAÉ BAK  JAMBÔ  ACÈH TV
Bersama Cek Medya Hus

Assalamu׳alaikum kawôm meutuah
Ummi ngon Ayah Rakan sinaroe
Sambôt Saleuem lôn bak phôn deuh leumah
Acara meuriyah nibak malam nyoe

Caé bak Jambô meu atô naskah
Ateueh keureutah lôn baca jinoe
Bak Acèh tv neuci eu jeulah
Meubèk neuminah Aduen ngon Adoe

Sastra Budaya nyang ka rap punah
Laju tapapah beubagah jinoe
Rot Aceh tv lon ci seuleu ah
Beutoi ngon salah meu׳ah ulôn nyoe

Kruseumangat rahmat meuhambô
Geutanyoe syukô keu Allah sidroe
Deungo beusaré Caé bak Jambô
Jangeun meututô nibak watèe nyoe

Aneuk leuk meusu ateueh –u ijô
Cempala a-ô ateuh bak panjoe
Ngon izin Allah bèk leupah tuto
Bèk rôh teukabô bak buet lagèe nyoe

Budaya Acèh bèk lilèh keundô
Beutapeutawô ulèh geutanyoe
Kiban nyang mungkén wahé Dalem e
Asai bèk loyô beudoh tasiboe

Di La-ôt Laweueng ureueng keumawé
Ateueh pucak glé ureueng pot Unoe
Dang teungeut malam rakan bohaté
Neudeungo Caé nibak ulôn nyoe

Seuni budaya Sastra meu uké
Peumangat haté bandum geutanyoe
Pusaka useueng lam bideueng Caé
Taci peudeuh lé bak masa jinoe

Geusawok udeueng dalam Krueng Sabé
Ureueng keumawé di kuala doe
Bak Acèh tv lôn ci meu Caé
Deungo beusaré rakan sinaroe

Etnoe keuh bak phôn saleuem lam Caé
Beumangat haté nyang deungo buet nyoe
Pat pat na salah meu׳ah beu neubré
Kuta ngon diglé pemirsa kamoe

Wassalam dari Cek Medya Husen
Gue Gajah 14 Desember 2008

HADIH MAJA (NARIT MAJA}

NARIT MAJA

Meunyo jeut tanyoe peulaku.
Boh labu jeuet Asoe kaya
.
Meunyo hanjeuet tapeulaku.
Nyan ie madu jeuet keutuba.

Pang ulèe alat parang meuseupôh.
Pang ulèe piyôh rumöh Agama
.
Pang ulèe harkat umöng ngon lampôh.
Pang ulèe utôh Ileumèe beuna.

Tamita blang nyang jeut padé.
Tamita glé nyang jeut lada

Mita Raja nyang tém piké.
Hukôm Adé meu Agama.

Utak peunoh mudah raseuki.
Utak simpi payah meu Atra

Meunyo carong  pah meubagi.
Hana sangsi gadoh jeumba.

Kulét keundô tambô rusak.
Ureueng buhak sulét haba.

Nyang teukabô le gop teunak.
Nyang got Akhlaq le Syédara.
Éndatu.
DOK MEDYA HUS

SENI TUTUR ACEH..

SENI TUTUR ACEH SEBAGAI MEDIA EFEKTIF PENYAMPAIAN PESAN
Seperti daerah-daerah lainnya, provinsi Aceh juga memiliki karya Sastra yang beragam. Bahkan,hampir di setiap kabupaten di Aceh mempunyai karyanya masing-masing.
Sastra Aceh berkembang seiring perkembangan peradaban dari abad ke abad, dan baru dikenal pada abad ke 14, namun sastra lisan telah berkembang sejak Aceh dikenal pada abad ke 9. Aceh sebagai bumi Seuramoe Mekkah, mewariskan beragam corak Sastra Islami. Dari Aceh pula pembaharuan Sastra Melayu Indonesia yang memiliki asset kekayaan generasi Sastra klasik.
Sampai saat ini Seni Sastra Aceh seperti Narit Maja (peribahasa) Meurajah (mantra), Hiem (teka-teki), panton (pantun) serta Caé atau Syair masih lestari dan cukup di gemari masyarakat. Di gampông-gampông yang ada di Aceh, Seni Sastra ini tidak pernah ditinggalkan dan menjadi bagian dalam Implementasi kehidupan local mereka, Melalui Seni Sastra yang bercorak ragam lisan ini pulalah, pesan-pesan disampaikan kepada generasi ke generasi secara turun-temurun.
Adalah Medya Hus, satu dari Seniman Aceh yang secara terus-menerus berusaha melestarikan Seni Sastra Aceh khususnya Seni Tutur, Seni Tutur ini dilaksanakan pada event yang berskala kecil sampai pada event yang berskala internasional misalnya acara Adat, event Seni dan Budaya, serta event festival di dalam dan di luar negeri. Di Aceh TV sebagaisebuah televise local di Aceh , yang memiliki komitmen sebagai icon pelestarian Seni dan Budaya Aceh, Medya Hus mengasuh program Caé bak jambô, Meupantôn, Meuratôh dan Seumapa di Aceh TV.
Caé, adalah salah satu kesenian Aceh yangcukup di gemari sampai sekarang. dalam Sastra Aceh, cerita prosa dikenal dengan istilah haba, sedangkan bentuk Puisi disebut Caé, Caé dalam Seni Sastra Aceh secara Tradisional dikenal dengan beberapa bentuk, baik yang diterima dari Tradisi Melayu maupun yang dikembangkan dari konvensi Puisi Arab, di samping Puisi-puisi asli Aceh. Seni bersyair ini kerap kita temui dalam ragam aktivitas Tradisional masyarakat Aceh. Kedekatan dan daya tarik seni tutur ini pada kultur masyarakat Aceh menjadikannya sebagai Media Tradisional yang efektif dalam penyampaian pesan kepada masyarakat.
MONDRIS TAWAN
Direktur Program Aceh TV

PANTON NASIHAT

PANTÔN NASIHAT
Oleh. Medya Hus

Watèe ka malam ka peungeuh buleuen.
Nyo watèe ujeuen leupie bukon lé.
Nyoe pat na pantôn bak lôn peujangeun.
Ci neu peureumeun geulantoe Caé.

Kayèe sibak ramphak that dheuen.
Bungöng di leuen hudép saré.
Buet nyang karôt bèk peureumeun.
Nyang kheun meukheun bèk tapiké.

Meunyo tanyoe jak u dalam rimba.
Beukai beutaba tanyoe peuhasé.
Meunyo beut teuh gèt deungon Syédara.
Ukhuwah teubina han meupaké.

Yôh goh lom tayoe koh ôn meuriya.
Purieh beusigra beuta peuhasé.
Yôh masa goh lom tanyoe keurija.
Rugoe ngon laba beuna tapiké.

Yôh goh lom tanyoe tajak u paya.
Awai seudia nyan bijèh padé.
Yôh goh teulanjô peue keurija.
Bak Ureueng Tuha tanyoe tanyöng kré.

Aneuk glueh agam di dalam rimba.
Di Aneuk buya bak iku tubé.
Beurang kapeue buet peudoman beuna.
Ngat teupat banja han karôt akhé.

Di langèt manyang na bintang kala.
Όh malam jula cahya hana lé.
Yôh mantong kukôh tubôh anggota.
Ingat keu tuha beuna tapiké.

Geupula bayam dalam blang raya.
Tasiram hana ban mandum maté.
Nyo hana sunggôh yôh masa muda.
Όh watèe tuha susah bukon lé.

Didalam la ôt eungkôt meudôda.
Didalam paya teumeugom bacé.
Seunang ta udép meunyo sép harta.
Dak tan keurija tapajôh wasé.

Gunöng seulawah meugah na dua.
Nyang saboh Dara cidah meu uké.
Sunggôh 'Ibadat Syufa'at teuka.
Sunggôh keurija seunang ׳oh akhé.

Reudôk lam uteuen ujeuen pih teuka
Lam krueng meukapa cabeueng meuranté
Bèk that peureumeun reun mareun dônya
Tanyoe ji daya rôh lam buet jahé

Tajak usabang jeumeurang kuala.
Rot lhôk krueng raya ék jalô kawé.
Meunyo tagalak bak buet nyang beuna
Seunang ׳oh lusa di uroe pagé

Jalan Meulabôh tumbôh u-tripa
Jalan Keumala tumbôh u-tangsé
Peue nyang tapubuet beujeuet takira
Rugoe ngon laba awai tapiké

Di bate tutông semantông tapa
Di guha naga jiduek uleue glé
Peue nyang tapubuet beujeuet meuguna
Bèk sia sia rugoe ׳oh akhé

Ranup kunèng ôn di keubôn yahwa
Nyang tuha-tuha lurôh bak tangké
Ètnoe keuh pantôn bak lôn Syédara.
Jeuet neupeuguna simpan lam haté.

Banda Acèh 2007
Pengarang: Medya Hus.
--------------------------------

PANTÔN KEU RAKAN
Oleh: Medya Hus

Aneuk leuek meusu ateueh bak sukôn.
Di aneuk tiyông dicông bak ara.
Keu sidroe rakan lôn kirém pantôn.
Haté that rihôn sabé di mata.

Toe binèh pasi riyeuek meususôn.
Kayèe ijô ôn lam uteuen raya.
Rakan seutia kaji ôh ngön lôn.
Meubuleuen meuthô hana geugisa.

Bungöng malori tari ngon cidah.
Bungöng meu ulah harôm lagoe na.
Wahé Sahbat lôn nyang that meutuah.
Hoka neulangkah h'ana berita.

Riyôh dalam glé meupaké reungkah.
Gaki kapatah di klik béraya.
Lôn deungo angèn meurèn-rèn leupah.
Kagadôh reupah kawé tan mata.

Sayang boh mancang leukang bak tangké.
Ateueh bak tanlé lurôh meukeuba.
Wahé Cut Bang lôn Ampôn bohaté.
Bèk turôt haté peuseutot dônya.

Ureueng jak meugoe dalam blang toe glé.
Ureueng keu mawé lam lubôk paya.
Bèk lé peuseutot meurot ratabé.
Beuna tapiké keu masa tuha.

Sayang boh mamprèe meuseubèe lurôh.
Sayang boh sawôh angèn peudôda.
Peuturôt haté kareulé tubôh.
Peuturôt sa ôh h'an trôh tagisa.

Geu kawé eungkôt di la-ôt teudôh.
Dikap geureupôh deungon jeunara. 
Kajeuet neupiké bèk lé meugadôh.
Kajeuet neupiyôh bak buet tan guna.

Bintang dilangèt meunblèt-blèt ijô.
Cahya meuhambô keunoe udônya.
Neuwoe beurijang wahé abang e.
Bèk lé neutajô ho-ho nyang hawa.

Takoh bak panah tarah keu bapeuen.
Ta adèe bak leuen teungoh uroe kha.
Wahé sahabat rakan lôn jameuen.
Kajeuet peureumeun bak buet nyang beuna.

Tajak usabang jeumeurang la-ôt.
Payah taék bôt lèwat krueng raya.
Bubayang dônya bèk lé peuturôt.
Bèk lé meulimbôt ngon ija ruja.

Gunöng gurutèe singkèe ula-ôt.
Timoh bak rambôt blah lamno jaya.
Bèk lé Bang ingat nyang ka ulikôt.
Kajeuet peu seupôt buet-buet tan guna.

Keterangan. Pantôn ini telah di baca di acara
Pantôn Acèh di Acèh TV.(Medya Hus)
---------------------------------------------

PANTÔN PEUTRÔT DÔNYA
Oleh: Medya Hus

Tajak Krueng Raya tamita karéng
Tajak Umanggéng tamita boh drien
Peuturôt dônya ulèe meupuséng
Harta meutunggéng geutanyoe gasien

Keupeue meuguna tanyoe peugot wéng
Jéh tubèe Gadéng ka gajah pusieng
Keupeue lom guna na ija tabéng
Nyak Dara linténg ka awai gop kring

Di công bak-u di meusu Peureuléng
Di ateueh bak Rhéng Ulat meukuwien
Bak jalan jahat bèk that keureuléng
Dudoe teuh juléng mata bak meungieng

Di binèh krueng geutheun nyaréng
Keunong Seureudéng deungon Lubiem
Bak buet nyang jahé bèk lé tapaléng
Dudoe geutunggéng udalam Jahim

Όh taék Honda ruda meupuséng
Di Moto Giléng dijak meulawin
Nyoe keuh Pantôn lôn ci baréng
Neuci Saréng tubai ngon liem

MEDYA HUS
------------------------------------
 
                    GURA
           Oleh: Medya hus


Gura peunayông meugampông cina.
Gura di cunda seupôt le Ureueng.
Gura jameun nyoe jeuet sagoe kana.
Teumpat tamasya awak sadeue keueng.


Hayeue di Acèh le that bahasa.
Hayeue di jawa ramè that Ureueng.
Hayeue jameuen nyoe dum Dara Muda.
Hana soe langga Inöng di rayueng.


Gura bu paték di ék selèra.
Bôh keudroe sigra ubé èk makeuen.
Gura ׳oh keubit maksiet lam dônya.
Ka di meulomba ha ék peureumeun. 


Gura di laôt ribôt meutaga.
Geulumbang raya jalô di tinteueng.
Gura Aneuk Miet ubit ban raya.
Ka di meu cinta di keue-keue ureueng.


Aneuk leuek meusu công tampu dara.
Aneuk leuek subra ateueh meunileueng.
Jameun kaseudèe malèe hanlé na.
Aurat ulua dijeuet peu diyeueng.


Aneuk tulô lheueh ateueh u dara.
Binèh kuala kawé Ureueng theun.
Meunyo buet maksiet cit nit soe langga.
Meunyo buet beuna cit le meulanteuen
.
Pantôn ini telah di baca di acara pantôn
                      di Acèh TV
               Blang Bintang 2008
            Pengarang: Medya Hus
           ------------------------------