CAÉ CÉK MEDYA HUS
=BULEUEN NYANG SUCI=
Deungon Bismillah di babah sabé
Baca hana pré peue takeurija
Beuthat dua krak tasajak Caé
Deungon gléh até ingat Rabbana
Kruseumangat Rahmat meublé-blé
Sijuek lam haté leupie lamdada
Buleuen nyang suci lôn ci neuk rawé
Lôn cuba uké dua lhèe banja
Buleuen Ramadhan Tuhanku neubré
Cukôp le hasé Fahla dan Taqwa
Nibak buleuen nyoe tanyoe bèk pré-pré
Mita laju lé amai ngon Fahla
Lethat hikeumah Allah dum neubré
Keu Hamba saré sinoe di dônya
Meuganda Fahla cit na lam sabé
Bah ubé padé pubuet nyang beuna
Beuthat ubé ôk meutumpôk hasé
Metuléh sabé peue takeurija
Asai tapubuet tan jeuheuet piké
Deungon gléh haté surôh Rabbana
Ngon karna Allah Ibadah bèk pré
Peuji-ôh jahé upat ngon ceula
Buet-buet hana got bèk taseutot lé
Beuthat le hasé tamöng beulanja
Gunöng Gurutèe batèe toe jalan
Gura hana ban meususôn banja
Bak sithôn siseuen buleuen kemenangan
Umat meu Iman seunang gembira
Wahé Syédara mita Amalan
Nyang surôh Tuhan tuwo teuh bèk na
Sunat ngon wajéb peusép hai Taulan
Buet kejahatan bèk na bak gata
Tameu seudeuqah meutuah badan
Uroe kemudian leupah bak bahya
Bèk kriet that haté reulé Amalan
Dalam Ramadhan beujroh mulia
Meunrôt mampu ta bantu Insan
Dak ngon pikéran pih raya Fahla
Deungon teunaga Fahla meukuyan
Seusama Insan berbagi rasa
Buleuen suci nyoe tanyoe e-rakan
Inöng ngon Agam mukmin lam dônya
Yôh mantong teuga na kesempatan
Pubuet Amalan bèk sia-sia
Èt noe keuh Caé hasé karangan
Dari lôn tuan sialakada
Meunyo na cocok cok keu peudoman
Meu'ah e-rakan meunyo na gasa
Blang Bintang -5-Ramadhan -1432 H.
-5-Agustus - 2011 M.
Dari : Cék Medya Hus
...........................................................
CAÉ CEK MEDYA HUS
=SALEUEM UROE RAYA=
Assalamu׳alaikum kawom meutuah
Saleuem Ukhuwah bak Uroe Raya
Bak Cek Medya haba sipatah
Malam nyoe jeulah bak layeue kaca
Gantoe duek saho meuproe beurakah
Haba tapeugah bak Uroe Rya
Gantoe jeb seutrop nyang cukop mirah
Kuweh Keukarah bak Uroe Raya
Saleum lon peu-ek tabek ngon seumah
Nyang phon meutuah ubena pemirsa
Lheueh nyan pengarang Abang ngon Ayah
Nnyang kayem leumah bak layeue kaca
Keu T.A Sakti hormati leupah
Cek Amir meutuah ngon Leube Muda
Cut Ngoh Zulkifli pihna sipatah
Saleuem ukhuwah bakUroe raya
Teungku Samuti rawi got leupah
Saleuem sipatah bak lon nyang hina
Dhia Ubit Daroi leh soe nan jeulah
Saleum sipatah bak uroe raya
Bang Nasir limoe leh ho tan leumah
Katrep meuleupah cae geuh hana
Teuma Tarmizi pih meunan ulah
Saleuem lon seurah ngon lapang dada
Teuma keu Bit Cut bacut lon peugah
Saleuem sipatah nyang that mulia
Keu Keuchik Maimun saleum nyang ceudah
Lheueh nyan meutamah keu Ayah Muda
Keuchik Jailani goh turi jeulah
Rot Caé kisah saleuem lon sapa
Siti Asra dara nyang ceudah
Lheueh nyan meutamah Halodi Haka
Muhammad Ali Lamsim yakin sileupah
Peugot seujarah Cae geurika
Teungku Hatta Aje lon me si ulah
Saleum Muhibbah bak uroe raya
Teungku Min geundring ka lon ngieng jeulah
Seumangat leupah beuthat katuha
Teuma Lem Kari pih cukop gagah
Meujan na kupiah meujan jan hana
Teuma keu Cek Man pih han lon pinah
Saleum sipatah bak lon keu gata
Abi Dawod Samahani meukri that leupah
Lheuh nyan meutamah keu Syeh Min Cakra
Sulaiman Agani lon bi si ulah
Saleuem sipatah bak Uroe Raya
Teuma keu Cut Hab pih gap meuleumpah
Saleuem lon ruwah rot layeue kaca
Abu Sulaiman nyan di Gue Gajah
Saleuem nyang ceudah bak Uroe Mulia
Ter Istimewa keu Amir Hamzah
Saleuem ukhuwah sambat syedara
Laén nibak nyan rakan meutuah
Keu Mak ngon Ayah kawom dilingka
Tuha ngon muda hina ngon meugah
Dum hamba Allah Mukmin lam donya
Sepoh noe dilee teutee lon peugah
Saleuem ukhuwah bak Uroe Raya
Pat na salah lon langsong peu meu׳ah
Beuna ngon salah cut deungon raya
Wassalam dari: Cek Medya Hus
Dimaca di Aceh tv 3-9-2011 M.
.........................................................
CAÉ MEDYA HUS
UROE RAYA
Deungon bismillah kisah lon buka
Dua lhee banja haba lon peu-ék
Rot Caé Aceh saheh tarika
Bak layeue kaca meuleumpah asyék
Katroh lom sampoe meu Uroe Raya
Cukop gembira abang ngon adék
Oh lheueh Takeubi hate gembira
Kunjông syedara jeub rumoh geu-ék
Ladom bak qubu laju meudo'a
Qulhu geubaca ulèe meu asék
Jeurat geupeugleh beu abéh rata
Nyang jareueng teuka naleueng payah sék
Ta-eu jeut gampông dusôn ngon kota
Dum Manusia ili ngon mudék
Oh ban meurumpok deungon syedara
Meusaleuem lanja geu beu-ot tabék
Teuma oh lheueh nyan geumeu'ah desya
Ladom meuwawa meutarek tarek
Hate terharu rasa gembira
Bak Uroe Raya meubayék-bayék
Ureueng meu Iman nyang kagléh desya
Bak Uroe Raya syukur keu Khalék
Sibuleuen peunoh ka geupuasa
Uroe mulia gembira asyék
Bukon that sayang bintang kejora
Lam awan miga cahya hana le
Na cit nyang ladom bak Uroe Raya
Meuriya riya senang that hate
Meunyo aneuk Miet cit ka biasa
Tot lilen cina peu meu-en bude
Nyang cukop paloe tanyoe katuha
Oh Uroe Raya jak pubuet jahe
Ladom meu-en on lam bak meureuya
Leuho ngon asa teu ingat tan le
Saboh bagoe teuk aneuk miet muda
Mantong remaja jak pubuet jahe
Cok aneuk inong rawon ho hawa
Peudieng bak Honda dijak meurabe
Adak na ayah geuteugah hana
Kameunan rupa takalon lahe
Ladom maricon tam tum meutaga
Cukop gembira geutot hana pre
Geupike meunan meuuroe raya
Hana geukira nyan adat kafe
Ayah ngon aneuk ladom rap sama
Meulomba-lomba meupeu-en bude
Suai abeh peng hana geukira
Peunteng gembira kaseunang hate
Wahe kawom lon duson ngon kuta
Oh Uroe Raya beuna neupike
Adat geutanyoe kon meunan rupa
Ingat syedara bek pubuet jahe
Wassalam dari
MEDYA HUSEN
.....................................................
CAÉ MEDYA HUS
PENGEUET DROE KEUDROE
Assalamu'alaikôm kawôm Iseulam
Inong ngon Agam béna pemirsa
Sambôt saleuem lôn sion karangan
Dalam hiburan seni budaya
Alhadulillah limpah pujaan
Keu sidroe Tuhan yang Maha Kuasa
Seulaweuet saleuem keu Muhammadan
Pang Ulee Alam Rasul mulia
Ulon meulakee teuntee bak Tuhan
Beusehat badan deungon anggota
Hate lon beugleh berseh pikeran
Tuleh karangan lam Caé haba
Gunong seulawah meugah hanaban
Jinoe hai rakan leupie han lena
Laweut nyoe ta-eu hayeue hai rakan
Meumacam ragam buet Manusia
Nyang saboh bagoe meunoe ban macam
Harap ban tuan peugasien papa
Cok surat gasien teken le yoh nyan
Peugot keterangan bak keuchik desa
Surat kurang mampu laju geureugam
Ho ngon tujuan laju geujak ba
Padahai ta-eu ladom ureueng nyan
Na moto sedan lampoh ngon atra
Hak ureueng asien geucok dig op nyan
Pakon roh meunan buet Manusia
Nyang ureueng gasien hana ban tuan
Nyang hak keu gopnyan kagop po jeumba
Peugeuet droe keudroe tanyoe lagèe nyan
Peungeut ngon Insan ngon Tuhan desya
Nyang kurang mampu wahe erakan
Beuna tatuban wahe syedara
Geuduek jambo brok batok meujan-jan
Aneuk na lapan hareuta hana
Keureuja tiep uroe jeut sagoe gop nyan
Meusep pajoh han lam keluarga
Aneuk sikula kahana jajan
Meunyo pakayan pakek an tuha
Teuekeudi saket ciret oh malam
Meu ubat pih tan meu ngon bloe hana
Geujak ngon gaki meugari pih tan
Meunyo makanan meu ala kana
Nyan moden ureueng tabi ban tuan
Kon ngon na sedan duek rumoh raya
Wahe pemimpin neungieng beuget trang
Beugot neutimang rakyat tajaga
Pemimpim gampong nyang phon hai rakan
Oh na bantuan beugot neukira
Fakir miskin beu neungieng beutrang
Beuget tatimang rakyat lam desa
Bagi beu ade nyo na bantuan
Bek sampe rakan Tuhan lhom bala
Etnoe keuh mantong dari lon tuan
Singoh lom rakan tasambong teuma
Lon lakee meu'ah wahe e-rakan
Haba lon tuan kadang gasa
Wassalam dari Cek Medya Hus
..........................................................
CAÉ CÉK MEDYA HUS
= TASATOH BUDAYA=
Alhamdulillah Allah taingat
Seulaweuet meuhat teuma keu Nabi
Teuma keluarga seureuta sahbat
Όh lheuh nyan meuhat Ulama lagi
Neubi Ya Allah tubôh beusehat
Lôn neuk riwayat Caé tradisi
Teuntang budaya sigra lôn surat
Jinoe hai sahbat sang-sang kabasi
Acèh nyoe maju masa saboh hat
Eropa barat sampé u Turki
Na lhèe boh pasai nyang meuhai that that
Di Acèh meuhat yôh masa lawi
Nyang phôn Agama meunggema that that
Hukôm Syariat gèt that peuduli
Lheuh nyan pendidikan jalan jeuet teumpat
Carong dum umat SDM meukri
Lheueh nyan Budaya sama geuingat
Geu cinta that-that khasanah neugri
Adat Budaya peulara martabat
Meugah leupah that Budaya seni
Nyan lhèe peukara jaya leupah that
Jinoe hai sahbat kureueng lestari
Budaya Nanggroe tapakoe tan brat
Meunan cit meuhat Agama suci
Oh ta-eu ureueng rap laén Kiblat
Timu ngon barat Iman sang ka lhi
Budaya barô ta atô gèt that
Ata droe meulhat han tapeuduli
Acèh nyang maju Budaya Adat
Jinoe sayang that wahé e-akhi
Lagèe takalon bangon talihat
Budaya Adat seureuta seni
Kakureueng tampil tangieng sahbat
Kabeu-o that that ureueng lestari
Han tatém jaga harga raya that
Han tatém rawat ngon tapromosi
Padahai Acèh bèrèh leupah that
Nyo got tarawat ji tamong gaji
Tamong devisa nyo ta peusihat
Pakon taseungap han tapeuduli
Keupada pemimpin saran lon siat
Serius taingat keuneubah lawi
Beuna anggaran keunan beule that
Gantoe ta angkat maruwah neugri
Sama tapiké saré meupakat
Pemimpin ngon rakyat bèk dawa dawi
Piké keu Nanggroe pakoe beugot that
Peuwoe martabat lagèe yôh lawi
Acèh beumeugah rupiah beudapat
Makmu dum rakyat mudah raseuki
Ngon hasé Nanggroe tapakoe got that
Rata jeut teumpat trôh investasi
Bèk meugah Acèh ngon buet nyang jahat
Kasus pejabat deungon Korupsi
Ngon ladang ganja narkoba maksiat
Malèe leupah that Nanggroe serambi
Nyoe keuh harapan keu rakan meuhat
Terutama peujabat seureuta waki
Aceh tapeugot takot buet jahat
Ubak Hadharat tamohan diri
Ya Allah neubi kamoe beusehat
Pemimpin ngon rakyat beu geulindungi
Ureueng nyang zalém beu geutém taubat
Hukôm Syari'at maju beuneubi
Etnoe keuh Caé rawé lôn surat
Beujeut mamfa'at soetém peuduli
Lôn lakèe meu'ah salah ngon silap
Lôn piyôh siat wahé e-akhi
Dari Medya Medya Hus
Dibaca sabtu malam di Aceh tv tgl. 24-9-2011
Acara Cae bak Jambô
...................................................................
CAÉ CÉK MEDYA HUS
SAPEUE PAKAT
Kruseumangat rahmat bak Allah
Keunoe meulimpah timu ngon barat
Nabacut haba lon rika kisah
Meunyo na salah meu'ah e-sahbat
Hudep lam donya syedara meutuah
Beukong ukhuwah wareh keurabat
Beusaboh haba peu sapeue peugah
Bèk meuparikah han sabé pakat
Peue lom di Acèh saheh ka leumah
Oh lheueh ro darah kadamè got that
Hanalé karu jampu prang bicah
Kheundak Po Tallah tarasa mangat
Jinoe geutanyoe jeuet sagoe beupah
Seuramoe meukah peulara leugat
Beusapeue pubuet beujeuet paedah
Beusapeue peugah ngon sapeue pakat
Ulama Umara rata daerah
Beusapeue peugah saboh pendapat
Teuma peumimpin beuyakin leupah
Tulus ikheulah keu pimpin rakayat
Beusaboh hate bek cre aqidah
Iseulamiyah jaga beugot that
Nyan phon ta peukong ta peudong beupah
Kasaboh arah kasaboh kiblat
Oh ka se iman Islam kapah
Beusaho langkah tujuan bulat
Beu sapeue pajoh tabloh se arah
Nyan baro jeulah nanggroe meu daulat
Beda pekeran lam musyawarah
Tan masaalah asai beumeupat
Ngon bek tapeudong nyan beuneung basah
Tapeugot hujah beda pendapat
Tamse ek jalo tajo lam sarah
Tan meuho arah meujungkat-jungkat
Ureueng nyang kayoh bek roh amarah
Ueueng nyang galah jalo peuteupat
Teuma ureueng duek bek gabuek leupah
Bek sihet siblah gundah siat-at
Saboh jalo nyan saban seumeugah
Bak bagah leupah bek le meularat
Oh ka sapeue kheun lanteun pih ka glah
Bak bahya leupah tulong Hadharat
Tapi nyo karu tunu amarah
Meugom lam sarah ka habeh hayat
Meunan keuh tamse tapike beupah
Bek sampe salah oh nanggroe tamat
Yoh masa awai sambai bukulah
Oh te kamewah idang bulukat
Oh tamat tumpok ta adok beupah
Seunang ngon susah beu ade that-that
Beusapeue pakhok tarhok dalam klah
Dak na fiteunah han tumboh liwat
Wahe Bangsa lon ampon doli syah
Sukee nyang meugah peunoh martabat
Tapeugot nanggroe peuwoe Maruwah
Beusapeue peugah timu ngon barat
Talakee do'a nibak po Tallah
Aceh nyang meugah meuwoe seumangat
Beu ade makmu meusyeuhu meugah
Lindongan Allah Pemimpin ngon Rakyat
Wahe rakan lon kawom meutuah
Rata daerah timu ngon barat
Beudoh bersatu peumaju daerah
Bak buet nyang salah peubeuna leugat
Bek le ta imdroe tapakoe bagah
Aceh nyang meugah nyang po cit rakyat
Soe nyang mat tampok tajok amanah
Nyo hana keumah tajok nasihat
Nyo han geupateh kajadeh salah
Tamusyawarah cok jalan teupat
Peue lom di Aceh cit bereh leupah
Ohna masalah na hukom adat
Hana meunantang deungon syari'ah
Beuna ngon salah mandum jih teupat
Meunan nyang mungken beutatem papah
Soe nyang meusalah penjara teumpat
Èt noe keuh Caé ka hasé kisah
Seubagoe amanah bak ulôn rakyat
Haba Èndatu buhu lôn surah
Ngat na gaiarah sastra lôn surat
Dari awai phôn lôn lakèe meu'ah
Bak ujông jeulah pih meunan meuhat
Ètnoe sikada rika lôn peugah
Singoh ta tamah nyo tubôh sihat
Dibaca oleh Cek Medya Hus
Sabtu malam 1-10-2011 di aceh tv
..........................................................