Panton Aceh Medya Hus

BEUGLÉH GAMPÔNG
Oleh: Medya Hus.

Dicông bak jeumpa na Aneuk Tiyông.
Ateueh trieng beutông umpung Cémpala.
Nibak watèe nyoe jinoe tasambông.
Pantôn keu Gampông dua lhèe banja.

Riyeuek di la ôt ribôt meugulông.
Ureueng tôt jagông ׳oh ujeuen teuka.
Beudoh Syédara nyang na di Gampông.
Tapeugléh jurông beu peungeuh dumna.

Beudoh di Lhôknga tagisa ulhông.
Gunöng ta arông kulu cot jeumpa.
Lingkungan berséh tapeugléh langsông.
Bèk di meulindông jamok bahaya.

Lam glé Seulawah Reungkah ngon lutông.
Dipo Seumantông ׳oh malam jula.
Demam berdarah meurambah Gampông.
Taceugah langsông yôh goh bahaya.

Kapai tereubang manyang ngon lamông.
Nyo kapai capông yub awan mega.
Di lingka Rumöh tapeugléh langsông.
Gôt deungön jurông peugléh tiep masa.

Όh ujeuen raya tabuka payông.
Όh uroe tutông geutanyoe dahga.
Bèk udép jamk lambruek keu tupông.
Beutatém sinthông tapeugléh lingka.

Lam lampôh teubèe asèe dum ang-ông.
Dilét bui puntông ka keunöng suda.
Meubèk na teumpat jamok meulundông.
Tapeugléh gampông laju beusigra.

Mirah pati lheueh di ateueh tampông.
Ureueng koh reubông buleuen puasa.
Meunyo ka gléh kabèrèh Gampông.
Tanyoe teulindông demam bahaya.

Lamblang lueng putu geupula bakông.
Lamblang lhôk nibông padé ka dara.
Deumam berdarah taceugah langsông.
Mangat teulindông sehat dum rata.

Jameun top padé saré ngon leusông.
Jinoe jeuet gampông bak meusén geuba.
Nyo dusôn lagak semarak Gampông.
Dak trôk peungunjông nyaman terasa.

Geulumbang la ôt ribôt meugulông.
Kawé seukirông dikap jeunara.
Program kebersihan saban tadukông.
Supaya Gampông sehat dum warga.

Gunöng Gurutèe batèe meu ujông
Di meusu Lutông công kayèe raya
Beudoh bersatu peumaju Gampông
Kayèe peulindông beuna tapula

Diglé Lam teuba subra that tiyông
Ateueh trieng beutông meusu cémpala
Hijô lingkungan rakan tadukông
Glé beutalindông gampông tajaga

Pucak seulawah meugah that lambông.
Pucak Geureudông sijuek lagoina.
Ètnoe haba nyan rakan ta pancông.
Laén tasambông pantôn nyang gura.
                       
Banda Acèh 2006
Pengarang: Medya Hus.