SYAIR ACEH JAGA UTEUEN

Syair ini mengisahkan tentang Hutan dan penghuni nya

yang harus kita jaga..

  

TAJAGA UTEUEN

Sya'ir: Medya Hus/Lahoré AB.

Sayang lagoena Cémpala Rimueng.

Jidrop lé Ureueng meuhai hareuga.

Sayang that glé reulé pucôk krueng.

Kayèe dum keng-keueng ubit ngön raya.

Nyang teuga-tega hana peue linteueng.

Hukôm han jitueng demi beulanja.

Ilegal loging tangieng meu diyeueng.

Di angkôt bateueng Mantôk ngön Dama.

Gunöng dum dikrok buhok pucôk krueng.

Glé ka meuruweueng kayèe ka bungka.

Tadeungö shinsô a-ô dum ang-eueng.

Ka abèh kéng keueng Satwa langka.

Bue deungön Cagèe Himbèe ngön Rimueng.

Han ji tuho plueng ka peungeuh rimba.

Ka seu-uem uroe watèe musém khueng.

Kayèe ka ruweueng tan pat meudôda.

Ka beungèh Buya ׳oh ceukoe ie krueng.

Kabeungèh Rimueng ׳oh peungeuh rimba.

Nyang sayang leupah Gajah teueng bayeueng.

Glé abéh kéng-keueng bak meurot hana.

Ngön haté Mulia haba meubayeueng.

Keu bandum Ureueng di Acèh Raya.

Beudoh Syédara sigala bideueng.

Jinoe ta ampeueng soe teubang rimba.

Bèk lé erosi jeuet si teueng bayeueng.

Bèk ׳oh musém khueng seu-uem lagoena.

Όh musém ujeuen tan meutheun ie krueng.

Όh té ngöp reuleueng bôh-bah ie raya.

Bukon lé sayang Bintang sikureueng.

Ka awan lineueng hana lé cahya.

Nyö glé tateubang binatang teueng bayeueng.

Kahabéh kéng-keueng Hiawan rimba.

Όh ta-eu jinoe jeuet sagoe ruweueng.

Buet jaroe Ureueng jak teubang rimba.

Bak Uteuen lindông langsông di kaleueng.

Dakna nyang linteueng peureumeun h'ana.

Dakna himbauan toe jalan teuleueng.

Maklumat ampeueng bèk rusak rimba.

Adak dibaca Cuma di peukeueng.

Ka hana jitueng teutap di langga.

Sayang that Nanggroe jeuet sagoe kéng-keueng.

Gunöng glé ruweueng hancô dum rimba.

Kayèe dum dikoh nyang timöh jareueng.

Όh té musém khueng apui meu dôda.

Όh apui pajôh brôh deungön naleueng.

Ôn kayèe ngön cabeueng angöh jeuet baja.

Tanöh dum kacrah wah ׳oh musém khueng.

Han kong lé kareueng bak gunöng raya.

Όh uteun reuloh mèhmöh dum ureueng.

Bencana tan kureueng ulah Manusia.

Όhté khueng raya dahga dum Rimeueng.

Glé kabéh lapeueng bak meusom hana.

Meunan cit Buya kadoe dum reuleueng.

Kakuto ie krueng ngön leuhop rimba.

Gajah pih susah leupah teueng bayeueng.

Tanlé peunulueng rot jak ka cupa.

Bue ngön Eungkong bak dong teueng bayeueng.

Tan pat sadeue keueng glé nyö kahana.

Nyan jeuet Binatang guransang budueng.

Beungèh keu Ureueng ditrôn di rimba.

Ditrôn ugampông di kông teueng bayeueng.

Rumöh di tinteueng hana peue publa.

Di Raja Rimba di tampa Ureueng.

Di Buya lam krueng juah deungön kha.

Nyan punca seubab keumeukap Rimueng.

Le that buet Ureueng Adat meu langga.

Tajak dalam glé jahé takeubeueng.

Hasé tapaplueng ta syukur hana.

Hak hudép Makhluk nyang duek lam naleueng.

Hana ta lindông malah tasiksa.

Gajah tatiyeuep tadrop dum Rimueng.

Buya dalam krueng pih ta inanya.

Ètnoe Syédara haba lôn bayeueng.

Keu bandum Ureueng Syédara dumna.

Uteuen tajaga peulara beu useueng.

Bèk tapeukéng-keueng sayang lagoina.

Beudoh tajaga seugra ta linteueng.

Talindông Uteuen tapeulihara.

Sayang keu Cuco dudoe teueng bayeueng.

Glé abéh kéng-keueng Nangroe bahaya

Sudah dibaca oleh Medya Hus di Aceh TV.

2008

Pengarang: Medya Hus/Lahoré AB.