Syair Aceh Pemilukada Damai

SYA'IR ACÈH
PEMILUKADA DAMAI  2
Oleh: Medya Hus

Assalam׳alaikum kawôm di lingka
Meurumpok teuma nibak RRI
Caé siaran ׳oh malam teuka
Kanibak Pro sa kamoe meurawi

Sambôngan Caé Pemilukada
Deungo syédara putra dan putri
Bak Cek Medya Hus ngon Syehmin Cakra
Meutulak haba nibak RRI

Bungöng mangat bèe yup kayèe raya
Ceudah wareuna harôm meuwangi
Ingat waréh lôn dusôn ngon kuta
Pemilukada tajaga jeut si

Supaya suksès bèrèh dumrata
Jaga bersama bèk dakwa dakwi
Meubèk na riyôh bèk rôh meupaksa
Mita suara ngon cara keuji

Beubeutoi jalan atôran kana
Meubèk talangga wahé  e-akhi
Waloe pendapat meuhat meubeda
Όh takeurija bèk keunöng sangsi

Peue lom Kandidat nyang ka lhat gamba
Beuna neujaga beugot teliti
Bak teumpat Ibadah Meunasah Musalla
Bèk tipèk gamba bak Masjid suci

Kampanye terselubung gampông ngon kuta
Beuna neujaga bèk keunöng sangsi
Peue lom rôh padan rakan jak paksa
Cukôp bahaya peungarôh tabi

   
Silakan  rakyat  barat  utara
Geupiléh sigra ngon haté murni
Hana paksaan rakan syédara
Toh toh nyang suka terserah abi

Ubéna na calon dikalon rata
Lé rakyat dumna dusôn ngon pasi
Calon Gubernur dan Walikota
Όh lheueh nyan teuma calon Bupati

Toh toh nyang galak layak keuraja
Rakyat nyang baca deungon teliti
Cuma Kandidat meuhat peutaba
Bak rakyat dumna ta peugah visi

Peugah lagèe buet bèk jeuet keu dawa
Bèk raya haba jak peugah janji
Rakyat kacarong sangong tan léna
Hanpeue peutaba sie kamèng gasi

Dan lom  ׳oh neu ék bèk cara gasa
Geureutak ngon tampa secara keuji
Meunyo meunan buet jeuheut lagoi na
Dak meunang gata tan Ridha Rabbi

Bèk bak pemilu bangku tamita
Peugah Agama ayat bak bibi
Kon karna Allah tapeugah haba
Cukôp meudôsa beuhati hati

Wahé waréh lôn dusôn ngon kuta
Ikôt Pilkada suara tanyoe bi
Beuna taingat bèk lèwat cara
Miseue syédara peugawè Negeri
    
Nyo rôh lam timsès pangèh lagoi na
Laju bak gata ka keunong sangsi
Ka keunong peucat sayang that gata
Hana soe bèla nyo ka terbukti

Beuingat ingat meunbèk that riya
Yôh goh bahaya beuhati hati
Bèk bak jak bantu Teungku ngon Apa
Tanyoe sengsara Innalillahi….

Ingat rakan beh beurôh tajaga
Lam Pemilukada beugot teliti
Patéh atôran rakan syédara
Hambatan bèk na sukses Tuhan bi

Bak tanggai peut blah Maret gèt that cuaca
Leuen Masjid Raya geu Deklarasi
Pemilukada Damè Ikrar Bersama
Gubernur Walikota deungon Bupati

Ikrar bersama hana meulangga
Sukses Pilkada Nanggroe Serambi
Ubéna pejabat ikôt seureuta
Masyarakat dumna menjadi saksi

Pemirintah Acèh bèrèh lagoe na
Jajaran pemda sinoe provinsi
Bandum na geujak meusigak raya
KIP panitia wartawan meuriti

Trôh dari pusat meuhat Jakarta
Uroe nyan teuka dua droe Mentri
Mentri Hukum dan HAM  yôh nyan pih teuka
Ikôt seureuta mentri dalam negri

Yôh nyan Kandidat sangat gembira
Leun Masjid Raya kameujanji
Pemilukada Damè teuntèe na makna
Ukeue beujaya Aceh berseri


Meunan harapan saban meuhaba
Bèk rusak Pilkada nanggroe Serambi
Soe nyang peukaru musôh bersama
Hukôm ngon sigra penjara tabi

Beudoh ban mandum kumuen ngon apa
Damè tajaga bèk dawa dawi
Bèk  peugot  karu  timu  utara
Sukses Pilkada beu aman negri

Meunan harapan impian bangsa
Jangan lagi ada intimidasi
Jangan menghasut hujat dan paksa
Caci dan hina saling membenci

Jangan banyak omong sombong dan riya
Meunipu warga dengan janji janji
Untuk apa janji tepati tiada
Habis Pilkada hilang nya visi

Jangan ada lagi benci sesama
Di ajang Pilkada hilang Famili
Hilang nya teman kawan setia
Rugi nya kita rusak pribadi

Batèe meukareueng Pucôk krueng Woyla
Batèe meubanja Kuala Meurisi
Beudoh waréh lôn dusôn ngon kuta
Sukses Pilkada dusôn ngon pasi





     

Seusama rakan saban meujaga
Milik bersama Damè abadi
Bak Tuhan sidroe tanyoe meudo׳a
Halangan bèk na lé Allah neubi

Ètnoe keuh mantong meukarang haba
Tentang Pilkada nyang kamoe rawi
Meunyo na umu singoh lom gisa
Tasambông haba singoh keulai

Selamat  meupisah tameu׳ah désya
Beuthat meurupa hana taturi
Lewat siaran ngon rakan dumna
Saleum kamoe ba meulalui RRI

Pat pat na salah meupeugah haba
Tulông peubeuna bèk sagai sangsi
Supaya ngat jroh bèk reuloh haba
Korèksi beuna saran beutabi

Deungon Wassalam ka simpan haba
Singoh lom teuma sambông keulai
Dengon hareumat pendengar semua
Dimana saja penggemar RRI


            Sekian dari Pengarang  Cek Medya Hus
Dibaca Oleh: Cek Medya Hus dan Syeh Min  Cakra Dônya.
Di RRI Pro 1 Banda  Aceh    Tgl.  1  Jumadil  Awal 1433 H

    Dan. 24 Maret 2012  M   Jam -20 - 05  s/d  20—30  wib
      Malam Minggu

                  Acara ini
      Kerjasama  RRI Banda Acèh Dengan
         Dinas Perhubungan  Komunikasi
                     Informasi dan Telematika Acèh