SEUMAPA LINTO

CONTOH SEUMAPA LINTÔ

Oleh Medya Hus

Blah Lintô.

Assalamu׳alaikum ulôn bi saleum

Keurakan bandum tuha ngon muda

Kamoe nyang teuka cit ka trôh bak leuen

Keuchik ngon Imum ketua pemuda

Ureueng Tuha gampông langsông trôh mandum
Meutinggai  mideun  keunoe  meuteuka
Inöng ngon Agam rakan ngon kumuen
Adoe ngon aduen waréh syédara

Jak  intat  lintô  bak  judô  buleuen

Bèk lé meulanteuen janji meutuka

Adat bak dônya ka tapeurumeun

Reusam ngon Qanun kakamoe jaga

Ranup kuneng ôn meususôn rubeueng
Tawô bak abeueng bak lampôh tuha
Jurông neubuka sigra bi ruweueng
Bèk lé neu ampeueng kamoe di lua..

Jaweueb 1 Blah Dara Barô

'Alaikumsalam warah matullah

Jamèe trôh langkah cukôp mulia

Tika kameuleueng bak seueng nyang luah

Katrép meuleupah prèh jamèe teuka

Ureung tuha Gampông nyang dong meusiblah
Nyoe pat deuh jeulah tuha ngon muda
Dikawôm Hawa meubanja leupah
Ngon payông teuhah prèh Lintô muda

Yôh bunoe jurông langsông yue peuhah

Keuneuk meulangkah dalam Istana

Lintô nyang neuba nyan citka jeulah

Bak putroe ceudah meusandéng dua

Bungöng lam taman keumang si ulah
Cukôp that ceudah lam keubôn raja
Pakon jeuet teulat meuhat trôh langkah
Peue na musibah bak Jalan raya ?

Kamoe kabunoe hate that susah

Peue hana jadeh linto neujak ba

Sabab meujanji bak jeuem poh siploh

Oh watee katroh karap poh dua

Blah Lintô

Di ateueh bak-u  Tupè meulumpat

Ateueh bak langsat aneuk Cempala

Kon na musibah meulangkah teulat

Maklum hai sahbat na sidroe dua

Buet Intat Lintô cit le nyang teulat
Ka awai Bang Syat teulat Lém Baka
Όh katrôh teungku prèh geuchik siat
Όh ka beurangkat ka tingai Nyakwa

Di kawôm Ibu pih hanpeue ingat

Cukôp brat teulat bak ngui busana

Bajèe nyoe han pah sang mirah that that

Όhté beurangkat ka itam sukla

Sinan keuh lanteuen ka meutheun siat
Nyankeuh jeut teulat keunoe meuteuka
Bèk trép lé sinoe uroe tarék that
Lintô meukarat dalam uroe kha…..

Jaweub 2 Blah Dara Baro

Ranup sigapu boh pineung teucang

Tabôh tahidang keu jamèe teuka

Payah kamoe tanyöng nyan asoe hidang

Janji hai cut bang hajeuet meutuka

Masa ba Peuha kana perjanjian
Meuulang ulang seulangké meuhaba
Adat ngon reusam tanyoe peutimang
Bèk jeut keu utang malèe bak dônya

Nyo goh sép neuba nyan asoe hidang

Payah peuriwang laju beusigra

Payah neumita sigra beurijang

Barô neu ulang keunoe neuteuka

Meunan cit laén seunalén pakaian
Peunuwoe cut bang keu sinyak dara
Sabab meuparéksa ׳oh trôh udalam
Cuma pakriban nyo leungkap hana

Nyo goh lom leungkap nyan asoe idang

Pinto meupalang hana meubuka

Meunyo kana lagee perjanjian

Jurong ngon rijang ka kamoe buka

Blah Lintô

Tajak ulèe lheue lingkeue usabang

Arông geulumbang peulayeue bétra

Nyo neuparéksa nyan asoe hidang

Keunoe hai cut bang kaleungkap meuba

Peunajôh Acèh bèrèh hanaban
Όh trôh udalam jeuet neuparéksa
Hana meutuka haba uroe nyan
Adat ngon reusam got that meujaga

Ngon tubèe meu ôn bang Samsôn gulam

Teuma ׳oh lheueh lasôn u-muda

Meunan cit laén seunalén cut Intan

Lam kofor itam leungkap seudia

Peue lom nak tanyöng laju lom rijang
Bèk trép neuhadang dalam uroe kha
Kalaén that hi bak dali sang sang
Kalgèe meuprang geutanyoe du

Jaweub keu 3 Blah Dara Barô

Kruseumangat hajat ka sampoe

Nibak uroe nyoe Lintô kateuka

Seunang that haté kamoe di sinoe

Judô Cut Putroe ceudah lagoina

Ateueh bak tarok Toktok Beuragoe
Ateueh bak Panjoe beurijuek subra
Meu׳ah hai bisan keu lôn tuan nyoe
Ubak Lintô tanyoe napeue pareksa

Peue ka muphom dum rukon manoe

Teungku Lintô nyoe etna sikula

Peue na geujak beuet Tauhid ngon jawoe

Ngon do׳a manoe kamuphom cara

Nyo goh lom muphom mandum meurunoe
Sajan  cut  putroe  payah  tatunda
Neujaweub rijang hai bisan jinoe
Mangat di kamoe jurông meubuka…

Aneuk leuek kutru ateueh bak mancang

Aneuk tulo blang ateuh bak Bangka

Meunyo kamuphom dum hukom islam

Nyan eunteuk malam hom jih dua

Blah Lintô

Bukon lé sayang takalon tiyông

Ateueh bak rambông sabé lam subra

Teungku seumapa sangka meu ujông

Sang keunong rincông meuputie haba

Teungku Lintô nyoe kon sigam bakông
Dijak beuet lambông bak Dayah Tuha
Jeuet didrah Kitab tauhid that muphôm
Nyo masalah hukôm gop dum di aja

Nyo bhah Agama bandum ka muphôm

Musabaqah tiep thôn geucok juara

Sikula manyang pikéran lambông

Keudeh ubandông jak cok s dua

Peukajeuet bisan keunan meutamong
Han ék lé meudong sinoe di lua
Meunyo bit mantong bisan teumanyong
Han ék lé meudong bah meuja gisa

Jaweueb keu 4 Blah dara Barô

Kruseumangat rahmat bak Tuhan

Kajeut hai Bisan neutamong sigra

Lintô nyang muda seureta rombongan

Tamong udalam jamèe nyang teuka

Meu׳ah ulôn nyoe bunoe meukalam
Kamacam macam ulôn paréksa
Ulôn nyoe tugah wakilah bisan
Adat ngon reusam ulôn laksana

Tatuka payông langsông peukeumang

Po Lintô seudang iréng bersama

Ho Nèk Peuganjô jak tueng lé rijang

Ngon haté seunang tapeumulia

Cok ranup baté tuka lé rijang
Raja jeunulang tamong astana
Sallo׳alé haté dum seunang
Teurimong Idang ubena neuba.

   

Blah lintô

Ateueh tuwalang sipasang gôt gôt

Ateueh bak Rambôt aneuk cempala

Bisan jak dikeue kamoe dilikôt

Meunan nyang patôt kheun ureueng tuha

Alham dulillah bagah lôn seu-ôt
Narit meusambôt tanyoe peumada
Tameu׳ah désya pat pat na karôt
Dikeue ngon likôt bèk jeuet keucupa

Timang ateueh droe jaroe meubeu-ôt

Irang ngon irôt bak kamoe teuka

Nyo kureung sopan kadang meudhôt dhôt

Kiban nyang patôt neu teugursapa

Abeh.. .

Ureung seumapa bandua geu meu׳ah desya.

Dan acara teurimong lintô meunurôt adat maséng maséng daerah

Dari Medya Hus
Blang Bintang  13-5-2012
( Buku Syair Aceh PEULARA ADAT )