Sabtu, 02 Maret 2013

SYAIR ACEH


                                  BA-E KEU BANGSA

       Syair: Medya Hus

Bukon that sayang si naleung sambô.
Ta-eu habéh thô dalam khueng raya.
'Oh Lôn eu bangsa ie mata teuh rô.
Meuleupah that le hudép sengsara.

                                    Inseueh weueh susah alôh-alah -e.
                                    Rakyat ramè thô lam nanggroe kaya.
                                    Ladôm lam sijuek geuduek bak jambô.
                                    Meupruet kakeundô troë geuh h`an tomna.

Bumoë Acèh,nyoë  hasé leupah le.
Nyang tahe-tahe,meu blèk-blèk mata..
Nyang carong-carong kantong h'ana thô.
Nyang peudéh ba-e geu prèh-prèh jeumba.

                                    Rakyat sengsara ie mata geurô.
                                    H'an tuho tajô mita beulanja.
                                    Nangroë that kaya harta leupah le.
                                    Tumpôk meu atô gohlom meurata.

Wahé bangsa lôn rihôn bungöng le.
Hanpeue taba-e, katrôh bak masa.
Beuraya saba bèk na teukabô.
Meudô'a beule tabah ngön saba.

                                                        Medya Hus

BEURAKAH


BEURAKAH
Syair:Medya Hus

Ija got beuneung jareueng that beukah.
Ija nyang mirah jareueng gop galak.
Ureueng nyang sulét le that beurakah.
Adak ngön Ayah ditém meubuhak.

Bak tameuhaba beule that nyang pah.
Tameubeurakah bèk na gop teunak.
Seubab meunyö kaleupah bak peugah.
Ka hana lé pah gop deungö palak.

Ka lazat lazém kayém kayém seumeugah.
Le meubeurakah teubiet meubulak.
Bak tanyoë piké le that pa-èdah
Padahai salah saboh geurubak.

Nyang ladôm geumarit cit sikrak pah.
Geu meubeurakah deungön that bijak.
'Oh té gop deungö bit nyö meu Dakwah.
Nyan keuh beurakah nyang that gop galak.

Wahé e-kawôm Ummi ngön Ayah.
Rakan meutuah bèk le that buhak.
Peue nyang tamarit tubiet lam babah.
Haba beupah -pah beuthat dua krak.

Medya Hus.