SYAIR INFORMASI PEMBANGUNAN 2013
23 Maret 2013 M. 11 Jumadil Awal 1434 H
Saleuem ukhuah bak kamoë dua
Pujoë seulaweuet tabuet tiep sa`ah
Bèk salah salah wahé syédara
Mula phôn haba ta pujoë Allah
Teumpat taseumah lé tanyoë dum na
Diphôn hai sahbat meuhat di babah
Pujoë keu Allah yang maha Esa
Seulaweuet Saleuem keu Rasulullah
Nabi Nyang meugah Pang Ulèe dumna
Lheueh nyan sahabat meuhat tatamah
Lom nyang meutuah keu keluarga
Para ′Ulama mulia leupah
Hana takeubah Salawat dan dô`a
Kruseumangat Rahmat meulimpah
Syukur keu Allah geutanyoë dumna
Nanggroë Acèh nyoë seuramoë Meukkah
Neu bri lé Allah nanggroë that kaya
La ôt deungon glé hasé meulimpah
Mantong cit susah rakyat jeulata
Tapi ′oh jinoë sayang mueluempah
Takalon leumah ngon dua mata
Kehidupan masyarakat sangat lah susah
Rata daerah takalon nyata
Hudép that sulét mita nafakah
Meunan keuh ulah takalon rupa
Dum ureueng meukat ka alôh alah
Daya beli rendah h'ana beulanja
H'ana ngön peue geubloë udép geuh susah
Leupah that payah mita beulanja
Ta eu lawét nyoë meunan keuh ulah
Rakyat barollah sayang lagoina
Padahai Acèh kaya sileupah
Seuramoë Mekkah ji thèe ulua
Acèh meu ceuhu tani that luah
Dumpeue dum mudah Allah karônya
Hasil pertanian melimpah luah
Sampai geu ulah expor ulua
Lagèe breueh bu ngön bawang mirah
Keudelai lomsah jagông lom teuma
Laén-laén lom han peu tapeugah
Ya masya Allah kaya lagoina
Teutapi pakon rakyat dum susah
Dum ho geuilah h'ana beulanja
Rata jeut teumpat geu jak tueng upah
Reu'ôh ngön reu ah dalam uroë kha
Pèng na geu puwoë tapi dit leupah
Meusapeue h'an glah ′oh ta beulanja
Harga pokok meulambông leupah
Han ék tailah sikilo saka
Rakyat menjerit meuceukiek leupah
Pakri ban ulah barang le tan hareuga
Tameubloë barang peureuleu leupah
Tapimeutuah h'an ék tadaya
Seubab lam jaroë tan pèng meusiblah
Ho-ho nyang tahah h'an di peucaya
Bak jameun jinoë nyata ka sudah
Jurang peu misah antara gasien dan kaya
Di ureueng kaya tan lé peumurah
Kue ureueng susah tan lé guenietna
Di ureueng kaya duek rumöh mèwah
Dum peue pih mudah le that hareuta
Udép di gop nyan h'ana tom susah
Hareuta Barollah kaya lagiona
Di ureueng gasien seudéh sileupah
H'ana meu siblah digop nyan atra
Nyo na geu mita na keuh faèdah
Meunyo untuk geu keubah hansép beulanja
Kaya ngon gasien jinoë kaleumah
Jurang peu misah jinoë ka nyata
Cemburu social ′oh dudoë jeulah
Wab hudép susah teranianya
Di công u puntông Aneuk Beuragoë
Merubôk manoë didalam cintra
Meusambông Caé Sampé seuleusoë
Deungo Teungku droë tuha ngön muda
Bak pemerintah jinoë tahimbau
Beu geutém pakoë akan rakyat bla
Rakyat bèk susah rata jeut sagoë
Malam ngon uroë beu ék seujahtra
Hareuga barang neu piké jinoë
Barang sembako bue jitrôn harga
Bèk lé meulambông harga sembako
Rakyat sinaroë susah lagoina
H'an ék dipiké lé rakyat nanggroë
Watèe di meubloë h'ana beulanja
Hai pemerintah neupikè jinoë
Bandum barang nyoeë beu jitrön harga
Neu buka pasar murah bèk jan galak droë
Nyo meunan bagoë h'ana get gura
Jinoë neu piké keu rakyat nanggroë
Pasar murah nyoë tiep uroë beuna
Beu neu kendali harga barang nyoë
Keu rakyat nanggroé neu gaséh beuna
Bèk neu duek mantöng hai pemimpin nanggroë
Si buleuen sigo saweue rakyat bla
Ekonomi di Acèh sayang han bagoë
Ta kalon jinoë h'ana meuputa
Pèng dum meutumpôk teu duek bak sagoë
H'ana bak jaroë pat tacok h'ana
Mungkén pembahasan gohlom seuleusoë
Ulèh DPR keu droë pembahasan gohna
Goh lom geukutok palèe bak jaroë
Goh lom seuleusoë geu kumpôi angka
Όh ka geu bahas bandum ka seuleusoë
Barô hai adoë pèng nyan meuputa
Nyan jeut syédara neu saba jinoë
Gohlom seuleusoë goh meu peu haba
Όh ka mue puta pèng nyan lam nanggroë
Barô geutanyoë meuteumeu rasa
Talakeèe dô`a bak Tuhan sidroë
Beumakmu nanggroë bèk that sengsara
Bukon lé sayang po bungöng geutoë
Ka ulat seudoë rawé keu sutra
Bacut teuk Caé rawé watèe nyoë
Neungo hai adoë Ayah ngön Poma
Ho ka pemimpin nyan na lam nanggroë
Neu piké jinoë rakyat jeulata
Beu neutém kalon rakyat Acèh nyoë
Pakriban jinoe rakyat lam desa
Kehidupan rakyat ta eu lawet nyoe
Sabe lam deuk troe tuha ngon muda
Neu ey beu jelas wahe pemimpin nanggroe
Pakri keuh bagoe rakyat sengsara
Neu kalon rakyat nibak masa nyoe
Aneuk ngon binoe udep nada`a
Hai bapak-bapak pue mimpin nanggroe
Rakyat aceh nyoe bue ek seujahtra
Pakriban cara neu pike jinoe
Rakyat Aceh nyoe beu na keureuja
Bek na pengangguran rakyat geutanyoe
Agam ngon binoe tuha ngon muda
Nyan beutapike le tanyoe jinoe
Keu rakyat nanggroe pike bersama
Supaya hudep bek sabe phang phoe
Malam ngon uroe susah lagoi na
Nyan keuh neu pike hai bapak jinoe
Rakyat lam naggroe beu ek seujahtra
Neu peugot irigasi keu ureueng meugoe
Seunang rakyat droe oh geu seumula
Meunyo le hasil didalam nanggroe
Han payah ta bloe breueh nanggroe lua
Seunang di rakyat seunang ditanyoe
Makmu lam nanggroe karu han le na
Nyan keuh pemimpin neu pike jinoe
Bek neu deuk keudroe seunang bak vila
Sayang that rakyat sideh ngon sinoe
Pemimpin nyang troe rakyat nyang papa
Takoh beureuhoi boh keutoi rangkang
Ta sek boh mamplam kulet beu gleh-gleh
Ho ka syedara inong ngon agam
Nyoe bacut peusan bak lon hai wareh
Peukarangan rumoh neu manfaatkan
Untuk kuebutuhan dapu neuh meuceh
Neu pula gule lam peukarangan
Nyan keubutuhan tanyoe hai wareh
Hana payah bloe sayor di peukan
Na lam peukarangan neu pula uroe jeh
Le that meubantu lam kehidupan
Tinggai anggaran hana le habeh
Udep mandirir geutanyoe rakan
Beu na pikiran tanyoe hai wareh
Beu tapeuguna nyan peukarangan
Di sampeng bak nyan halaman kagleh
Pajan peureulee jeut tapot rijang
Bandum atra nyan keu droe teuh wareh
Nyan keuh hai syedara haba lon peusan
Inong ngon agam sinoe ngon sideh
Meunan keuh bagoe nyang kamoe peusan
Dalam karangan dua lhee bareh
Lewat Radio meuato kalam
Dalam hiburan meubaca Tambeh
Leubeh ngon kureung bandum hai Cut Bang
Bak kamoe karang kadang han gleh
Meu`ah beuraya nyona nyang curang
Kadang bak kadang na nyang meulanggeh
Kasep syedara haba meureupang
Kamoe meuriwang acara habeh
Menyo jeut neungui neu pakek rijang
Deungon Wassalam terimong gaseh
Dan. 23 Maret 2013 M Jam -20 - 05 s/d 20—30 wib
Oleh: Medya Hus/Syeh Min Ckradonya
0 Komentar:
Posting Komentar
Berlangganan Posting Komentar [Atom]
<< Beranda