Minggu, 09 November 2014

SYAIR ACEH MEDYA HUS "SALEUEM"


                       SALEUEM
          Oleh: Medya Hus
 
Assalamu'alaikôm kawôm syédara.
Saleuem seumapa di dalam ca-é.
Saleuem ukhuwah leupah mulia.
Sambôt syédara ngön ikhlah haté.

Allhamdulillah limpah sejahtra.
Pujoë Rabbana beuna lam sabé.
Syukur keu Allah leupah mulia.
Rahmat keuhamba ka geubi tanpré.

Seulaweuet  saleum kheun sama rata.
Tuwo teuh bèkna keu Nabi akhé.
Nabi  Muhammad nyang that mulia.
Ngön keluarga seulaweuet bèk pré.

Teuma sahabat nyang that mulia.
Sereuta Ulama awai ngön akhé. 
Sabé teuingat tiep sa'at beuna.
Seulamat sejahtra meudô'a sabé.
     
Deungön beureukat rahmat Nyang Kuasa.
Sihat anggota di ulôn sabé.
Beutrôh ban hajat surat lôn rika.
Seunusôn haba keu ubat haté.

Deungon horeumat sahbat syédara.
Tuha ngon muda kuta ngön di glé.
Adoë ngon Aduen kumuen dan Apa.
Agam ngon Dara horeumat lôn bré.

Saleuem horeumat intat beurata.
Lam seni Sastra tradisi Ca-é.
Haba meupakhôk bé-ôk lôn rika.
Seni Budaya nyang karap reulé.

Bintang di langèt meublèt-blèt cahya.
Buleuen purnama peungeuh bukon lé.
Saleuem bak uboë ètnoë meumada.
Meu'ah syédara awai ngon akhé.

Pat-pat nasalah kisah lôn rika.
Peumeu'ah sigra rakan bohaté.
Bèk sampé dudoë tanyoë meudôsa.
Meu'ah syédara batén ngon lahé.
      
Kasép keuh èhnoë ulôn nyoë sapa.
Saleuem Seumapa nibak phôn ca-é.
Gantoë mat jaroë lé tanyoë dumna.
Rot Ca-é haba ulôn peusampé.
  
Sép 'oh noë dilèe teuntèe bak mula.
Karangan haba peuseunang haté.
Medya Husén nyang salén haba.
Jinoë di banda kon lé krueng sabé.

                             Blang Bintang.
                   23 Jumadil  Awal. 1430 H.
                           18 MEI 2009 M.
                      Pengarang: Medya Hus.
                               

                                                                  




Tidak ada komentar:

Posting Komentar